Cinîyê ke Şehba de yê, bado ke herême serra 2016’î de ameye xelesnayene sîstemê xo awan kerd. Cinîyanê ke xo zereyê Meclîsê Cinîyan ê Şehbaye de xo rêxistin kerdo, êdî her warê ciwîyayîşî de bi nasnameyê xo estê.

Îdarekeranê Meclîsê Cinîyan ê Şehbaye ra Rîfe Îbrahîm El Ehmede, Hamîde Temo û endama meclîsî Fatma El Mesrî ANF'yî rê qalê demê verî û şerî kerd.

Rîfe Îbrahîm El-Ehmede: Verê îşxalê DAÎŞ’î qet nêbo domanê min ê kênayî eşkayêne şorê wendegeh, heta eşkayêne şorê unîversîte. DAÎŞ’î reyde cuya ma bîye têser û bin. Cinî zereyê keyeyanê xo de neçar mendî. Tersan ra ma nêeşkayêne keyeyî ra bivejîme bi teber. Her tewir zulm ameyêne kerdene.

Bado ke ma DAÎŞ’î ra xelesîyayîme, ma newe ra ameyîme xo. Ma bîme wayîrê hêzê xo. Cinîyan cayê xo her warê cuye de girewt. Bi taybet zereyê komun, meclîs û sazgehan de ca girewt. Şoreşî reyde ma xo baştir nas kerd û fam kerde ke azadîye çi ya.

Fatma El Mesrî: Verê şoreşî zor û zordarîya girane cinîyan rê ameyêne kerdene. Bi ameyîşê DAÎŞ’î ciwîyayîş ma cinîyan rê bi îşkence. Tornêka mi esta 8 serrî ya, a zî bîle kerde çarşefe. Domana wina qije zî mecbur mendêne û rîyê xo girewtêne. Şoreşî reyde cinîyî hîna zêde aver de şîyî û bîyî xurtî. Cinîyan her warê cuye de ca girewt.

Hemîde Temo: Verê şoreşî cinîyî zafêrî hêgayan de xebitîyayêne û heywanî weyê kerdêne. Wexto ke DAÎŞ’î hêrişê dewa ma kerd, ma ciwanê xo berdîbî Efrîn. Ma zî ameyîme qezaya Herezî. 3 mengan ra dima ez û hemserê xo agêrîyayîme dewe. O wext DAÎŞ’î merdiman rê zaf îşkence kerdêne. Bi şoreşî sîstemêk virazîya û dewanê ma de zaf çîyî vurîyayî. Êdî sey verî cinîyî şidet nêvînenê.

Ma cinîyê Erebî jîr û karker ê, la birêxistin nêbîme. Verê ma teyna karê keyeyî de û domanan reyde eleqedar bîyêne. Nika ma vejînîme bi teber, cinîyan rêxistin kenîme, cimatî perwerde kenîme û eşkenîme hevalanê xo reyde dîyalogan ronîme. Mabênê cinîyan de têkilîyê zaf başî virazîyayî. Cinîke bîye hevala cinîyan.