Meclîsê Cinîyan ê HDPyî yê Dêrsimî  bi beşdarîya Hemsereka HDPyî Pervîne Buldan 5ê teşrîna peyêne roja pancşemeyî  kombîyayê cinîyan ê elewîyan do bikero. Hemsereka HDPyî ya Dêrsimî Nurşate Yeşîl venga pêro cinîyan da ke tewrê kombîyayîşî bibê.

Nurşate Yeşîl vist vîrî ke 25ê Teşrîna Peyêne Roja Têkoşînê Vera Şîdetê Serê Cinîyan  bena nêzdî û îfade kerd ke ê do Komîsyonê Bawerî û Şaran û Meclîsê Cinîyan ê HDPyî reyde pîya kombîyayîşê cinîyan ê elewîyan bikerê.  Nurşate Yeşîl vat: ''Ma do kombîyayîş de şîdet, kişîyayîşê cinîyan, îstîsmarê domanan, binpaykerdişê keda cinîyan ser o vinderê. Eke ma sey cinîyan têkişt vinderê, renganê xo bihêzêr bikerê ma zî do bibê bihêz. Ma pabeyê pêro cinîyan ê.''

Nurşate Yeşîl da zanayene ke kombîyayîş 5ê teşrîna peyêne de saete 13:00 de Restorantê Dîkîlîtaşî de do bêro kerdene.