Cinîyê êzidîyî yê ke kulturê qedimî yê kurdayetî danê ciwîyayene, hetê wayîrvejîyayîş û pawitişê komelê exlaqî ra zî bîyî rayber.

Cinîyê êzidîyî yê ke derheqê înan de 74 fermanî ameyî vetene, rixmê pêro qirkerdişan zî teslîm nêbîyî. 3ê tebaxa 2014î de fermanêko qirker seba komelê êzidîyan vejîya. La ewro cinîyê êzidîyî xo ver danê, xo perwerde kenê û rêxistinbîyayîşê xo geş kenê.

Cinîyê êzidîyî seba ke bieşkê xo bipawê seba xebitnayîşê çeke Meclîsê TAJÊ de perwerde vînenê.

Endama Meclîsê TAJÊ Fehîma Silêman a ke tewra perwerdeyê kalefnîkofî bîya vat: ''Ma zî tîya de amade bîyî. No perwerde seba ma zaf kêfweş o. Ma 12 rojan de perwerdeyo teorîk dî û ewro zî naskerdişê çeke seba ma bi firsendêko hol. Serra 2014î de ma ser o fermanêk dîya la nika ma xo ver danê, xo perwerde kenê. Ma do qet nêverdê ke dişmenî nêzdîyê ma bibê. Ma venga pêro cinîyan danê ke wa xebitnayîşê çeke bimusnê. Cinîyê êzidîyî wa bêrê xo rêxistin bikerê û tewrê TAJÊ bibê.''

Celîla Meto zî perwerde vînena. Celîla vat: ''Ma dayîkan zî tede tewrê perwerdeyê teorîkî bîyî. Perwerde weş bi, ma fermanî ra verî perwerdeyêko winasên nêdîbi. No perwerde bes nîyo ganî ma xo zêdêr perwerde bikerê. ''

Celîla Meto zî venga cinîyanê êzidîyan da ke wa xo îdare bikerê û xo nêdê destê camêrdan