Cinîyan ê kurdan çarçewa 25ê Teşrîna Peyêne Roja Têkoşînê Vera Şîdetê Serê Cinîyan xeylêk şaristananê Ewropa de pê aktîvîte û çalakîyanê cîya-cîyayan şîdetê vera cinîyan protesto kerd. Cinîyan aktîvîte û çalakîyan de fotografê cinîyanê ke ameybî qetilkerdene akerdî û mesajê paştdayîş û têkoşînî dayî. Cinîyan vera sloganê 'Cinîye, Cuye, Azadîye' vat.

Şaristanê Frankfurtî yê Almanya de cinîyan rayberîya YJK-E de pê kincanê herêmîyan çalakîya rayraşîyayîşî û nawnayîşî kerde. Cinîyan rayraşîyayîş de fotografê Arîne Mîrkan, Poyraz, Hevrîn Xelef, Sakîne Cansiz, Roza Lûxembûrg ê ke ameybî qetilkerdene kiriştî. Merkezê Frankfurtî de zî vera şîdetê kayêkê tîyatroyî ame mojnayene. Nawnayîş de zî nameyê YJK-E Hessen, Yenî Kadin, ADHK û xeylêk rêxistinanê cinîyan ser o qiseykerdişî ameyî kerdene.

Paytextê Almanya Berlin de cinîyan Torra Vera Qirkerdişê Cinîyan nawnayîşêk serûber kerd. Cinîyan dima zî eşkerayîyêke daye. Eşkerayîye de ame vatene ke cinîyê kurdî do vera sîstemê serdestîya camêrdan û hişmendîya qirkere-îşxalkere têkoşînê xo rê dewam bikerê. Nawnayîş pê sloganê 'Cinîye, Cuye, Azadîye' qedîya.

Paytextê Brîtanya London de Înîsîyatîfê Cinîyan ê Kurdan postaxaneyê Haringeyî de cinîyanê tepişteyan ê zîndananê Tirkîya rê nameyê paştdayîşî şawitî û dima zî eşkerayîye wende. Eşkerayîye de bale ameye antene ser ke netîceya polîtîkayanê dewleta tirke de bi hezaran cinîyî ameyî tepiştene.

Şaristanê Den Haagî yê Hollanda de rayberîya TJK-Fyî de bi şîarê 'Vera şîdetê serê cinîyan ma pîya têkoşîn bikerê' panelêk ame kerdene. Panel de Endama TJK-E Sultane Oger, Endama Cepheyê Demokratîkî yê Fîlîpînan Coniye Ledesma, Endama Platformê Cinîyan ê Dinya Petra Van Ham, Levî Ommen û Jolanda Winkelhuijzen qisey kerd.

Ogere îfade kerd ke xoverdayîşê cinîyanê Rojawanî cinîyanê dinya rê bîyo hêvî. Petra Van Ham pare kerd ke cinîyî do komelê sosyalîstî awan bikerê û azad bibê. Leviye Ommen bale ante têkoşînê vera nîjadperestîye û cînsîperestîye ser û vat ke cinîyî her roje koletîye, teda û hêrişan de têrî manenê. Jolanda Winkelhuijzen da zanayene ke heta ke cinîyî azad nêbê çew azad nêbeno. Panel pê sloganê 'Cinîye, Cuye, Azadîye' qedîya.

Şaristanê Dusseldorfî yê Almanya de cinîyan ê kurdan pê rayraşîyayîşêk û nawnayîşêkî 25ê Teşrîna Peyêne pêşwazî kerd. Cinîyan verî nawnayîş kerd. Nawnayîş de Vervatoxa YJK-E Aytene Kaplan û Hemsereka KON-MEDî Zubeyde Aslan qisey kerd. Qiseykerdişan de ame vatene ke cinîyî eşkenê pê têkoşînî verê şîdetî û hêrişanê îşxalî bigêrê.

Cinîyan dima dest pê rayraşîyayîşî kerd. Cinîyan pê pankartan paştî daye cinîyan ê afganan. Komêka cinîyan pê erbane û daholan tewra rayraşîyayîşî bîye. Rayraşîyayîş de maketê 'Bûka Baranê' ame kiriştene ke ser de 'têdûştîye, edalet, azadîye' ameyêne nuştene. Koma Aktîvîstan ê Femînîstan zî tewra kortejî bîye. Cinîyan rayraşîyayîş de deyîr û sloganî vatî û peynîya çalakîye de zî govende girewte.