Kurdîstan û Tirkîya de cinîyan 8ê Adare Roja Cinîyan ê Kedkaran a Dinya rîyê erdlerzî ra açarnaye paştîdayîşî. Cinîyan ê wanijan ke derheqê 8ê Adare de mesaj da, vîst vîrî ke emser cinîyî bi dejê girdî kewnê na roje.

Aktîvîste Zozane Ozgokçe vat: ''Ma dejê erdlerzê ke tesîrê 11 bajaran kerd, zerrîya xo de ,mezgê xo de hîs kerd.  Sey erdlerzê Wanî, nê erdlerzî de zî ma dî ke dewlete senî eciz a, qîmnêkerde manena. Reyna zî paştîdayîşê mabênê ma hêvî dano ma. Emser cinîyê ke kewenê 8ê Adare zafê înan merdimê xo vînî kerdî. Bi şîn û dejî dekewnê na roje. Ma pêro raşta şîn de yê. Ma emser raşta zî hem serewedarenê hem zî şîn de yê. Ma do dahîna zaf wayîrê yewbînan bivejîyê û hêvî xo ya rojanê şayan vînî mekerê.

Seba ke ma perseyî, vat pereyê erdlerzê Wanî ça de yê, ma rê dewayî ameyî akerdene, komeleyê ma ameyî qefilnayene. Tehemulê înan komelê sîvîlî û cinîyan ê azadan rê çîn o. Cinîyan ê rêxistinkerdeyan ra tersenê. Zanê ke ma milê xo çewt nêkenê. Ma do bi hêvî, serewedaritişî debikewê 8ê Adare.''

Serra 2023yî wa bibo serra têkoşînî

Yildize Tekîn zî vat: ''Ez hêvî kena serra 2023 semedê cinîyan bena serra têkoşînî û Pekerdişê Îstanbulî reyna yeno qebulkerdene. Cinîyî hem şerî ra û hem zî falekatanê xozayî ra zaf dej ancenê. Cinîyî seba ke erjanê xo pawenê ya yenê qetilkerdene ya zî erzîyenê zîndanan. Ez nika sektorê emlakî e dgurîyena. Mi sere de zaf zehmetîye ante. Çunke sey her cayî sektorê gureyî de zî serdestîya camêrdan est a. Ez eşkena vajî ke semedê cinîyan hema hema warê ciwîyayîşî çîn ê. Ma cînîyî her warê cuye de mecbûr manenê ke şer bikerê. Ma sey cinîyan gerek her ca de vajê, ma zî est ê. Cayo ke cinîyî tede yê, tede raştîye, haştîye û merhamet est o.''

Cinîyî eşkenê dinya bibedilnê

Sumeyye Minaz zî vat: ''Hêzê cinîyan têkoşînî erdlerz de zî xo ramojna. Ma erdlerz de reyna dî ke cinîyî senî semedê paştîdayîşî, hetkarîye gurîyene. Eke cinî bibê yew eşkenê dinya zî bibedilnê. 8ê Adare de gerek cinîyî yewîya xo xurtêr bikerê. Her warî de cinîyî raştê neheqîye yenê. Ma cinîyî warê gureyî de zî raştê neheqîye yenê. Camêrdî tehemul nêkenê ke cinîyî pê hêzê xo payan ser vinderê. Vera serdestîya camêrdan gerek cinîyî tim paştî bidê yewbînan. Cinîyî gerek tim bi ruhê 8ê Adare têkoşîn bikerê.''