Nê wextê janê Korona de ke pêro dinya de şîdetê vera cinîyan zêdîya cinîyêka êzidîye şaristanê Hildesheime yê Almanya de hetê mêrdeyê xo ra ameye qetilkerdene. Dadîya 3 domanan Besma Ekîncî ya 26 serre vizêr Çarşema Sor de hetê mêrdeyê xo Cemal Ekîncîyî (55) ra ameye qetilkerdene.

Dezgehê Paştdayîşê Cinîyan ê Ewropa û rêxistinanê TJK-E, Utamara, SMJÊ, FEDA derheqê babete de eşkerayîyêka hempare weşanaye. Eşkerayîye de serebûtê Onelya Çendîya ke menga adare de Dortmund de ameye kiştene ame vîrvistene. Eşkerayîye de ame vatene ke Besma zî sey Onelya fermanê 74. ra dima Şingalî ra koç kerd. Dezgehanê cinîyan vat ke Besma pê zorî Cemal Ekîncî reyde dîyaya zewijnayene û bîya cinîya ey a diyîne.

Eşkerayîya dezgehan wina ya: ''Reyna ma şahîdê qetilkerdişê cinîyêke benê. Ma sey têgêrayîş û rêxistinanê cinîyan nê serebûtî şermezar kenê, ma zaf xemgîn ê ke ma qerayîşê aye nêeşnawit. Ma keyeyê ci rê serweşîye wazenê û son wanenê ke ma do têkoşînê xo yê vera sîstemê pederşahîye yê kiştoxî dewam bikerê û hesabê kişîyayîşê cinîyan bipersê. Nê prosesê nêweşîya vîrusê Korona de şîdetê vera cinîyan zêdîyeno. Cinîyî rîyê karantîna ra nêeşkenê vengê xo biresnê selahîyetdaran û bi hawayêkê bêexlaqî yenê kiştene.

Na netîce netîceya vîrusê Korona nê, netîceya sîstemê serdestîya camêrdan a. Sîstemê camêrdan û hîşmendîya camêrdan cinîyan rê cayêko biasayîş nêverda. Keye cinîyan rê kerd zindan. Ma sey her wextî nê wextê karantîna de zî vera şîdetê serê cinîyan kampanya û xebatanê xo dewam bikerê. Ma wazenê cinîyan rê bibê cayê pawitişî, ma paştî bidê yewbînan û paştdayîş xurt bikerê. Coka vera şîdetê serê cinîyan bêveng nêmanê, vengê xo berz bikerê. Ma vanê ke vîrusê Korona nê hîşmendîya camêrdan cinîyan kişena. Ne pandemî ne zî camêrdê kiştoxî eşkenê têkoşînê ma yê vera şîdetî û qirkerdişê cinîyan kêm bikerê.''