Cinîyî do sîstemê axatîye yê Basanî ra vajê êdî bes o

Qezaya Basanî ya Şirnexî de 29 serrî yo ke yew keye, bi hewayê axatîye hukim keno û cinîyî vanê ma do bi ney weçînayîşî sistemê kolonyalîstî birijnê û seba naye amadekarîyan kenê.

Qezaya Basanî ya Şirnexî de 29 serrî yo kesê girêdayeyê yew keyeyî serekîya şaredarîye kenê. Sey sîstemê axatîye, eynî kesî bajarî îdare kenê. HDP xeylî bajaran de namzetê xo kerdî eşkera û namzetî goreyê bajaran projeyanê xo amade kenê û pêşkêşê şarî kenê. Namzeta  Hemserekîye ya Basanî ya HDP‘yî Zîlan Ecevîte zî derheqê projeyanê xo de qisey kerd.

Zîlan Ecevîte 25 serrî ya. Unîversîteya Ege ra sey Muhendisa Zîretî bîya mezun. Ecevîte domantîya xo ra nat Cizîre de ciwîyena. Sey her hetê welatî dewa înan Kanîreş a ke girêdayîye Cizîre ya ameya vêşnayene û naye ser keyeyê aye bar kerdo û ameyo merkezê Cizîre. 

TESÎRÊ SERRANÊ 1990’Î HÎNA ZÎ MI DE KAR KENO

Ecevîte derheqê ey wextî de wina qisey kerd: “Wexto ke ma dewe ra bar kerd ez zaf qije bîya û naye ra zî zaf çî nêno mi vîrî. La keyeyê ma de zaf zehmetîyî ameyî antêne û ê zehmetîyan mi rê zî tesîr kerd. Mesela maya mi destê mi girewtbî û ma sûka Cizîre de gêrayêne. Wexto ke ma polîs û cendermeyî dîyêne, maya mi tersan ver ricifîyêne. Mi peyê cû fehm kerd. O wext de doman maya mi ver şîyo. Qetlê pizêz û kal-pîran vileyê înan ra dardekerde yo.

Hîna zî rewşe eynî ya û doman, kal û pîranê ma de hîna zî no ters esto. La ma sey verî nîyîme û hîna xover danîme. Bi saya cinîyanê xoverdayoxan ma o ters şikit û ma fehm kerd ke bi ters nê, bi xoverdayîşî ancax merdim eşkeno aver şoro. Ez zî seba ke xover bidî û mucadele bikî bîya namzet.“

SEBA KE SÎYASET DE CINÎYÎ BÊRÊ TEMSÎLKERDENE

Ecevîte tena wexto ke unîversîte wenda vejîyaya teberê Cizîre û unîversîte ra dima reyna agêraya Cizîre û bi hewayêkê aktîfî kewta zereyê sîyasetî. Weçînayîşê verî de bîya namzetê parlamentoyî.

Ecevîte peynîya qiseykerdişê xo de wina va: “Basan de 29 serrî yo ke yew keye şaredarîye îdare keno. No sîstemo kolonyalîst û sîstemê axatîye yo. Ma cinîyî na rewşe rê vanîme êdî bes o.“