Endama Meclîsê Cinîyan ê HDKyî Fatma Kiliçaslan bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ANFyî rê qisey kerd.

Menga êlule de polîsan waştbî ke Fatma pê zorî cinuşnê wesayîtê xo û biremnê. Polîsan Fatma rê gefê sey 'belaya xo mede dewlete, ma do to Anqara de teng bikerê' wendbî. Rixmo ke Fatma gerreyê polîsan kerdbî derheqê polîsan de tehqîqat nêamebi akerdene.

Fatma Kiliçaslan bale ante ser ke vera betalkerdişê Peymana Îstanbulî têkoşînê înan tim beno pîlêr û vat: ''Îqtîdar estbîyayîşê cinîyan xo rê seyb tehlukeyî vîneno. Na menge têna 22 cinîyî kişîyayî. Sebebê nê cînayetan polîtîkaya bêcezaverdayîşî ya. Seke Musa Orhana ke tecawuzê Îpeke Er kerdbi 'dewlete mi rê çîyêk nêkena' camêrdî yenê xelatdayene. Xora hukmat zî heman mesajî dano û keno ke cinîyî vengê xo nêkerê. Cînayetê Denîze Poyraz de ma dî ke polîsî verê kiştoxî de têgêrayî, senî o pawit.''

Fatma Kiliçaslan ard ziwan ke ê do 25ê Teşrîna Peyêne de vejîyayî meydanan û vat: ''Ma pê bawer ê ke têkoşînê ma do geş bibo û vengê ma xurtêr vejîyo. Cinîyî wextê Rewşa Îstîsnayîye de zî bêveng nêmendî, vejîyayî kuçeyan. Key ma vejîyenê kuçeyan şîdetî vînenê. Ma hêz û meşrûtîyetê xo hêz û têgêrayîşanê cinîyan ê dinya ra gênê. Cinîyê ke verê dewlete de çok nêşîyê erdî ro ewro zîndanan de yê la xoverdayîşê xo rê dewam kenê. Ma zî kuçeyan de vengê înan do bidê eşnawitene.''