Hêrişê dewleta tirke yê vera Têgêrayîşê Cinîyan ê Kurdan dewam kenê. Sîyasetmedar û aktîvîstê cinîyî yê kurdî yenê destbendkerdene, tepiştene û kiştene. Bitaybetî cinîyê ke sey sembolê têkoşînî yenê zanayene yenê hedefgirewtene. Rojanê peyênan de vera Têgêrayîşê Cinîyan ê Azadan (TJA) polîtîkayêka taybet yena rayraberdene. Aktîvîsta TJA Xecê Şen konseptê hêrişî yê vera cinîyan ê kurdan ANFyî rê ercna.

Şene vist vîrî ke her her cayo ke tede têkoşîn û îradeyo azad est o bêşik vera ci mekanîzmaya hêrişî zî est a û vat: ''Sîstemê tarîyî xora tim vera îradeyê azadî polîtîkayan aver benê. Na raştîyêke rejîmanê otorîter û îşxalkeran a. Cinîyan ê kurdan xeylêk serewedarişan de sey qehremanan têkoşîn kerdo. Her cinîya kurda ke tarîxê kurdan de bîya sembol rayîrê têkoşînî mojnena cinîyan ê bînan. Ma zî sey TJA wayîrê nê mîrasê têkoşînî vejîyenê.  Leyla Zanayan ra heta Leyla Guvenen rejîmê îşxalkerî wazenê hêrişê nê mîrasî bikerê la vera nê cinîyê kurdî tim têkoşînê xo xurtêr kenê. Her cinîya azada ke yena qetilkerdene û tepiştene herinda ci de bi desan cinîyî têkoşîn de cayê xo genê. Mîsalê nê yo tewr pîlî zî pêrodayîşê mabênê aktîvîsta ma Ayşe Acar Başaran û temsîlkarê rejîmê îşxalkerî yo ke çend hewteyî cuwar qewimîya.''

Xecê Şen vat: ''Cinîyê kurdî seba ke bi têkoşînê xo îşxalkeran tersnenê raştê hêrişan yenê. Gamêka wirdî zî semedê xo sey tehluke vînenî. Hişmendîya azadîye ya cinîyan xo rê sey tehdîtî vînenî û hêrişanê xo de sînor nas nêkenê. Coka polîtîkayanê xo yê şerê taybetî zafêr vera cinîyan rayra benê. Cinîyî her roje raştê nê polîtîkayan yenê. Cinîyî vera her hêrişî têkoşîn xoverdayîşê xo domnenê. Ewro Têgêrayîşê Cinîyan ê Kurdan xo her hetî ra xp aver berdo û rayîrêkê têkoşînî afernayo ke no rayîr dinya de xeylêk cinîyan rê beno referans.Coka ewro hêrişê ke vera cinîyan ê kurdan benê, cinîyê dinya senî ke înan rê bibê, wina genê dest û nêrazîbîyayîş mojnenê. Cinîyan ê kurdan heme dinya rê ramojna ke ê senî zerrîya safî ra têkoşîn kenê. Aye ro no têkoşîn do çirey peyser game meerzo û tim bi heme renganê xo  dewam bikero.''