Meclîsê Cinîyan ê Partîya Demokratîke ya Şaran (HDP) û atkîvîstanê Têgêrayîşê Cinîyan Azadan (TJA) qezaya Xelfetî ya Riha de vera paştdayîşê hukmatî yê tecawuzkaran eşkerayîyêke daye.

Eşkerayîye de Parlamentera HDPyî ya Riha Ayşe Surucu qisey kerd. Suruce bale ante ser ke îqtîdar wazeno ke sîyasetê demokratîkî tasfîye bikero û vat: ''Naye zî bi hêrişê vera destkewteyanê cinîyan kenê. Bi qanûnanê ke vejenê cuya cinîyan û komelî rê kenê tenge.  Prosesê pandemî sey firsendêkî şuxulna û qanûnê înfazî vet. Nika zî rojdemê înan de qanûnê îstîsmarî esto. Bi nê qanûnî tecawuzkaranê qican serbest vera danê. Ma sey cinî tim tewirê xe vera nê qanûnan eşkera ramojnenê û çirey milê xo çewt nêkenê. Ma do vera hêrişan xo ver bidê. Seranê peyênan de îstîsmarê vera qican hîrlab zêdîya. Nika tecawuzkaran vera danê û qican bi tecawuzkaran zewijnenê. Ma do desturê naye medê.''