Bi wesîleya 8ê Adere Roja Cinîyan ê Kedkaran a Dinya xeylêk bajaranê Vakurê Kurdîstanî û Tirkîya de serkêşîya TJA û Meclîsê Cinîyan ê HDPyî de aktîvîte û çalakîyî ameyî kerdene.

Qezaya Cizîre ya Şinexî de çarçewa aktîvîteyanê 8ê Adare de vera polîtîkaya asîmîlasyonî ya vera ziwanê dayîke rayraşîyayîş ame kerdene. Wekîla HDPyî ya  Şirnexî Nurane Îmîr, Mayê Haştîye û bi seyan kesî tewrê çalakîye bîyî. Cinîyan dovîzê ''Dem Demê Azadîye yo'' kiriştî û bi slogana ''Cinî cuye azadîye'' qîrayî. Badê rayraşîyayîşî Nûrane Îmîr qisey kerd. Îmîre vat: ''Zîhnîyetê camêrdê serdestî her hetî hêriş keno. Sey dişmenê nêzdîyê cinîyan ê kurdan benê. Çew nêeşkeno vera ma qal bikero. Ma cinîyî qeraranê xo bi xo genê. Kenê ke ziwanê 40 mîlyon kurdan qedexe bikerê.  Ganî helêke cuwa ver ziwanê kurdkî bibo ziwanê perwerdeyî. Wazenê ke ziwan û kulturê ma qir bikerê. Ma sey cinîyan ê kurdan vera polîtîkaya asîmîlasyonî do wayîrê kulturê xo vejîyê. Mefteyê ziwanê kurdkî Cîzîra Botan a. Se beno wa bibo ma do tim wayîrê ziwan û kulturê xo vejîyê.'' Badê qiseykerdişan cinîyan pê kuwayîşê erbenayan deyîrê kurdkî vatî û govende girewte.

Amed de çarçeweya aktîvîteyanê 8ê Adare de Yenîşehîr de vilawekî ameyî vilakerdene û semedê tewrbîyayîşê çalakîya ke do 8ê Adare de Meydanê Îstasyonî de bêro kerdene ame vengdayene. Qezaya Stewrê ya Mêrdînî û Meletî de şayîyî ameyî organzekerdene. Vervatoxa HDPyî Ebru Gunay tewrê şayîya Mêrdînî bîye. Riha û Semsûr de zî derheqê 8ê Adare de eşkerayîye ameye dayene û bale ameye antene xoverdayîşê cinîyan ser. Şayîyan de mesajê xurtkerdişê têkoşînî ameyî dayene. Wan de bi tewrbîyayîşê Wekîle Muazzez Orhan têhetameyîşê cinîyan û Tûxê Bedlîsî de zî bi tewrbîyayîşê Wekîla HDPyî Feleknase Uca û hemşaredara verêne Diba Keskin aktîvîtêyeke ameye kerdene. Aktîvîte de Îmraliyî rê selam ameyî şawitene. Reyna Mersin, Antalya, Îzmîr û xeylêk bajaran bînan de zî cinîyan bi eşkerayîyan bale ante hêrişê dewlete  û xoverdayîşê  cinîyan û kurdan ser .