Çarçewa kampanyaya Meclîsê Cinîyan ê HDPyî ya ''Têkoşînê cinîyan her ca de yo'' cinîyî qezaya Beşîktaşî ya Îstanbulî de ameyî pêser û veng da ke vera bêtêdûştîya qanûnê înfazî têkoşîn bêro kerdene. Cinîyan dowîzê bi nuşteyê ''Vera qeyûm, îstîsmar û înfazî têkoşînê cinîyan her ca de yo'', ''Qanûno ke dişmenê cinîyan o'', ''Domanê nêeşkenê domanan bîyarê'' û fotografê sîyasetmedaran ê cinîyan kiriştî.

Hemsereka verêne ya HDPyî yê Îstanbulî Esengule Demîr vist vîrî ke pê qanûnê înfazî tecewuzkerî, cergî do bêrê veradayene la cinîyê sîyasetmedarî hê zîndan de yê. Esengule Demîr îfade kerd ke nê hewteyî ê do seba tepişteyanê sîyasîyan çalakîyanê xo bikerê. 

Hemsereka HDPyî yê Îstanbulî Elîfe Bulut zî vat: ''Ma keyeyê xo de biasayîş nîyê. Eke qanûnî têdûşt bîyêne kiştoxî teber de nêbîyêne.  Ma do vera înan vinderê, meydanan terk nêkerê. Ma venga cinîyan danê ke têkoşînê birêxistinî pîl bikerê. ''

Vervatoxa Meclîsê Cinîyan ê Îstanbulî Besere Çelîk zî wina qisey kerd: ''Nê prosesî de vera tepişteyanê cinîyan binpaykerdişê heqan zêdîyayî. Tecrîd bîyo xorin. Ma venga hukmatî danê ke krîterê têdûştîye wa bîyaro ca. Ma veng danê ke cade zîndanî bêrê vengkerdene.''

 Çalakîye pê sloganan qedîyaye.