Stuttgart û Marsilya de cinîyan bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan çalakîyî kerdî û şîdetê camêrdan şermezar kerd.

Şaristanê Stuttgartî yê Almanya de rayberîya YJK-E de çalakîya rayraşîyayîşî ameye kerdene. Cinîyan ard ziwan ke cinîyî pêro waran de raştê tacîz, tecawuz, îşkence û şîdetê manenê û vera ney ganî têkoşîn bêro berzkerdene. Çalakîye de sloganê sey 'Cinîye, Cuye, Azadîye' ameyî wendene.

Çalakîye de eşkerayîya TJK-E zî ameye wendene û serrgêra ronayîşê PKKyî ameye fîrazkerdene. 

Şaristanê Marsilya yê Fransa de cinîyan rayberîya Meclîsê Cinîyan ê Arîne Mîrkan de çalakîyê rayraşîyayîşî û mîtîngî kerdî. Cinîyî verî pê dowîzê 'Cinîye, Cuye, Azadîye' rayîr a şîyî, vilawekî vila kerdî. Şaredara Marsilya Martine Vassal wextê çalakîye de vervatoxanê Meclîsê Cinîyan ê Arîne Mîrkan de pêvînayîş kerd.

Temsîlkara Solidarite Liberte Kurdîstan Annike Samalien çalakîye de qisey kerd û serrgêra ronayîşê PKKyî fîraz kerde û vat: ''PKK seba awankerdişê cinîyan ê azadan û cuya ekolojîke têkoşîn keno.'' Cinîyî dima pê sloganan ver bi walîtîye şîyî û çalakîya xo qedînaye.