Hemserekê Pêroyî yê DEM Partî Tuncer Bakirhan Amed de partîyanê sîyasîyan zîyaret keno. Bakirhanî verî Partîya Merdim û Azadîye (PÎA) zîyaret kerd. Hemvervatoxê Înîsîyatîfê Yewîya Demokratîke Mehmet Kamaç û Gulcane Kaçmaz Sayyigit û Hetkarê Hemserakanê Komîsyonê Tekîlîyanê Bi Partîyan ê Sîyasîyan ê DEM Partî Ozleme Gunduz zî tewrê zîyaretî bîyî.

Hemserekê Pêroyî yê PÎA Ahmet Kaya û Hemsereka PÎA ya Amedî Banu Ay û îdarekaranê partî heyetê DEM Partî vervazî kerdî. Gulcane Kaçmaz Sayyigit vat semedê yewîya kurdan nê pêvînayîşî muhîm ê. Ahmet Kayîyî zî vat ê do paştî bidê prosesî.

Tuncer Bakirhanî ard ziwan ke ê derheqê prosesî de partîyanê sîyasîyan de pêvînayîşan kenê û nê vatî: "Seba ke ma fîkr, rexne, vernîyazanê partîyanê xo bîgiro ma nê pêvînayîşan kenê. Birêz Ocalanî bi xo zî vat bitaybetî pêvînayîşê bi partîyanê kurdan muhîm ê û waşt ma  rexne û vernîyazan not bikerê, pêvînayîşê bînî de biresnê ey. Ma zî dest pê pêvînayîşanê xo kerd. No proses têna mabênê DEM Partî û AKPyî de nîyo, na meseleya ma pêrun a. Fîkrê PÎA ma rê muhîm ê. Coka ma ameyî." 

Bakirhanî persê Rayber Apo wazeno Mesûd Barzanî û Bafil Talabanî reyde pêvînayîş bikero wina cewab kerd: "90yan ra nata xeylê reyî semedê yewîya neteweyîye ya demokratîke vengdayîşî ameyî kerdene. Ma qala Rayberêkî kenê ke semedê kongreya neteweyîye veng da. Seba ke no proses tesîrê Iraq, Sûrîye, Îran û herême keno, zaf normal o ke Birêz Mesût Barzanî, Talabanî û rayberanê partîyanê bînan ke ûca de yê pêvînayîş bikero. Na mesele de ma do tay temasan bikerê. Ma hêvî kenê ke Birêz Ocalan demê kilmî de rayberan ê kurdan reyde pêvînayîş bikero. No zaf erjîyaye û muhîm o."

Pêvînayîş dima ra çapemenîye rê qefilnaye dewam kerd. Bakirhanî dima ra Komeleya Kulturî ya Şorişgêr Demokrate (DDKD) zîyaret kerd. Mehmet Kamaçî ke tîya qisey kerd bale ante yewîya kurdan ser û vat ê do 26ê temmuze de Bazîd û destpêkê teşrîna verêne de zî Mêrdîn de do konferans bikerê.