Grevê vêşanîye yê bêdem û bêagêrayîşî yê ke hetê hemsereka KCD’yî Leyla Guvene û bi seyan tepişteyan ra seba wedartişê tecrîdê serê Rayberê Şarê Kurdî Abdullah Ocalanî yenê dewamkerdene, roje bi roje benê krîtîk. Cinîya şehîdê xoverdayîşê Cizîre Orhan Tûnçî, Guler Tûnçe derheqê grevê vêşanîye yê Leyla Guvene ke 90 rojî xo pey de verdayî qisey kerd. Tûnçe, Leyla Guvene û her kesê ke hemverê tecrîdî de hurzenê silam kerdî û vat, waştişê xoverdayoxan waştişê înan o.

Tûnçe ard vîrî, Guvene û xoverdayoxê bînî seba Rayberê Şarê Kurdî û şarê Kurdî bedenê xo dayê vêşanîye ver û vat, “Ma vînenê ke bi serran o Ocalan û şaro Kurd tecrîdkerde yo. Naye ra xoverdayoxan bedenê xo da mergî ser. Ganî ma teber de na çalakîye rê wayîr vejîyê. Çalakîya Leyla Guvene û embazanê aye yê ke zîndanan de yê, xoverdayîşê Zîndanê Amedî ra û xoverdayoxanê cêrzemînanê Cizîre ra cîya nêya. Beno ke vengê Cêrzemînanê Cizîre tam nêro aşnawitine û her kes bêveng mend. Seba ke reyna heman çî nêbo, ganî ma verê nê xoverdayoxan de bêveng memanê.”

VERO KE ŞEHADET VIRAZÎYO…

Tûnçe ard vîrî, grevê vêşanîye kewto roja 91’ine û vat, “Çalakîyê heme hemrayan roje bi roje kewenê halêkê krîtîkî. Halê înan ê weşîye baş nêyo. Vero ke şehadet bibo, ganî ma dest bidê yewbînan, çalakîya înan hîna bikerê pîle û pîya nê tecrîdî wedarê. Muhîm o ke ma her wareyî de nerazîbîyayîşê xo ramojnê û hendî hurzê lingan ser. Ganî ma bibê vengê Leyla û embazanê aye.”

Tûnçe heman wextî de hemverê medyaya merkezîye ya Tirkîya de zî nerazîbîyayîşê xo ramot ke xo kerdo kerr û vat, “Rayapêroyîye ya Tirkan sey her reyan xo ker, lal û kor kerda. Bi nê hawayî çalakîye peygoş kenê. Xora ma înan ra çîyêk umîd nêkenê. Ez tîya ra veng dana şarê ma yê Vakûr, Başûr, Rojawan û Rojakewtena Kurdistanî. Ganî Rojakewtena mîyanêne heme bibo yewe û seba na çalakîye pîya mucadele bidê. Vero ke bedenê embazanê hîna zaf bihelîyo, ma netîceyêkê rindî bi dest bifînê.”