Tesîrê pandemîya Covid-19î yê seba dinya zêdîyeno. Kurdîstan û Tirkîya de hûmara qurbanan zî zêdîyena. No zî keyeyanê tepişteyan qerqilneno. Keyeyê tepişteyî pê qayîl nîyê ke rejîmê AKP-MHPyî tepişteyê sîyasîyî teberê qanûnê înfazî de verdayî.

Aysele Ateş ard ziwan ke lajê aye Mehmet Veysel Ateş 6 serrî yo ke Zîndanê Amedî de tepişte yo û pare kerd ke ê fam nêkenê ke çira tepişteyê sîyasîyî teberê qanûnê înfazî de ameyî verdene.

Ateşe vat: ''Seba ke ma rewşa weşîya domananê xo nêvisnê binê tehlukeyî ma nêşinê pêvînayîşan. Labelê ma qebul nêkenê ke tepişteyê sîyasîyî teberê qanûnê înfazî de yenê verdene. Ez wazena vaja ke ma seba domananê xo efû nêwazenê. Çunke înan çîyêk nêkerd ke efû bibo.''

Ateşe îfade kerd ke vîrusê Korona tesîrê her kesî keno û vat: ''Zîndan de cayê 4-5 kesan de zaf kesî manenê, werdê înan tay o û weş nîyo. Hûmara tepişteyan ê nêweşan zêdêr a. 2 mengî yo ke ez nêeşkena lajê xo bivîna. La wexto ke ma telefon de qisey kerd lajê mi vat ke rewşa zaf giran a û tay mendo ke vîrus bikewo zîndanan. Lajê mi vat destê şima ra çi yeno bikerê.''

Ateşe eşkera kerd ke ê paştî danê her kampanya ke seba veradayîşê tepişteyan ê sîyasîyan yena kerdene û vat: ''Ez nê kampanyayan zaf bifayde û însanî vînena.''