Dayîka Haştîye Muhsine Çiftçi ya ke semedê çareserîya meselaya kurdî bi serran têkoşîn kerd, dinyaya xo bedilnaye.

Muhsine Çiftçi 1928 de dewa Omeranî ya qezaya Bongilanî ya Çewlîgî de ameye dinya. Seba ke hema ciwanîya xo de babîyê qijanê aye dinyaya xo bedilnaye, qijê xo şertanê zehmetan de pîl kerdî.

Lajê ci Delîl Ayhan (Îlhan Çîftçî) o yo ke qadroyanê serkêşan ê PKKyî ra yew bi 4ê teşrîna verên a 1992yî de şehîd bi û a roje ra dima dinyaya Dayîke Muhsine bedilîyaye.

Seba ke waştişê azadîye yê lajê xo bîyaro ca dest pê têkoşînî kerd.Seba ke qijî memirê û haştîye bêro bi aşman kewt grevê vêşanîye û her platformî de semedê haştîye û azadîye qîraye.

Serranê 90yan de gama ke pêkewtişê tewr xorî qewimîyayêne, cinayetê ke kiştoxê ci nimteyî zêdîyayî, verê konvoyê serekwezîre Tansu Çiller girewt û waştişê xo yê azadîye û haştîye ard ziwan. Cesaretê ci meseleya kurdan de a kerd vengê haştîye.

Muhsine Çiftçi semedê haştîye tim xebityaye û çîyo ke destê ci ra ame kerd. Rîyê têkoşînê semedê haştîye ra kewt mehkemeyan, cezayê cîya cîyayî dîyaye ci. Mecbur mend surgun de ciwîyaye, rixmo ke extîyar bî û xeylêk nêweşîyê ci bibî aye çirey têkoşînê haştîye û azadîye canêverda.

Muhsine Çiftçi seba ke felç bîye xeylêk wext nîmeyê bedenê xo nêeşkayêne bişuxulno. Dayîke Muhsine 20ê tebaxe de dewa Omeryanî ya Bongilanê Çewlîgî de dinyaya xo bedilnaye. Cenazaya Muhsine Çiftçi dewa ci de ameye definkerdene û tezîye zî dewa Omeryanî de ameye ronayene.

Reyma merdimê ci yê ke surgun de yê 25ê tebaxa 2024î  roja yewşeme do bajarê Antwerpenî yê Belçika de tezîye rone.

Adresê cayê tezîye wina yo: Carnotstraat 136