DEM Partî Çewlîg de kongreya xo diyîne kerde. Serekwekîla Grûba DEM Partî Gulîstane Kiliç Koçyigit, Wekîlê Çewlîgî Omer Faruk Hulaku û xeylê kesî tewrê kongre bîyî.

Badê rêzgirewtişî dîwan ame vîjnayene. Dima ra Serekwekîla Grûba DEM Partî Gulîstane Kiliç Koçyigit qisey kerd.

Gulîstane Kiliç Koçyigit bale ante şerê Rajhelatê Mîyanênî ser û nê vatî: ''Hêzê emperyalîstî wazenê bi Şerê Dinya yê Hîrêyînî şaran yewbînan rê bidê kiştene. Xora no qismêk yeno caardene zî. Rojhelatê Mîyanênî de şarî yenê qirkerdene. Şerê Îsralîl-Fîlîstînî de 45 hezar gazzeyijan dinyaya xo bedilnaye. Ewro Sûrîye de rejîmê HTŞyî elewîyan qir keno. Elewîyan sey dewamê Esadî vîneno, cinî, doman nêvano qir keno û heme dinya nê qirkerdişî seyr kena. Ê ke qala merdimîye, erjanê globalan kenê derheqê gonîya elewîyan de ya ke ewro yena rişnayene, qet çîyêk nêvanê.''

Gulîstane Kiliç Koçyigit ard ziwan ke Tirkîya bi çareserkerdişê meseleya kurdan eşkena xo şeranê Rojhelatê Mîyanênî ra bixelisno û nê vatî: ''Rayberê Şarê Kurdî Abdullah Ocalanî rixmê şertanê tecrîdî na raştîye dîye. Birêz Ocalan tim welat, herême û dinya rind waneno û tehlîl keno. Eynî wextî de rayîrê çareserkerdişê meseleyan zî ramojneno. Çi heyf ke vera heme adirbirnayîş bi operasyonan cewab ame dayene. Her gama haştîye bi polîtîkayanê leyminan ameye vindarnayene.  Rixmê heme zulman, nizdîbîyayîşanê negatîfan Birêz Ocalanî çirey waştişê haştîye û çareserîya demokratîke ya meseleya kurdan canêverda.''

Wekîlê DEM Partî yê Çewlîgî Omer Faruk Hulaku zî bale ante vengdayîşê tarîxî ser û nê vatî: ''Gerek nê prosesî de her kes berpirsîyarîye bigîro. No semedê ma destpêkerdiş o. Birêz Ocalan vano demokratîkbîyayîş. Nê semedî ra gerek ma pêro nê prosesî rind biwanê.''

Badê qiseykerdişan Sedat Ormangoren û Nerîmane Bolkan sey hemserekanê DEM Partî yê Çewlîgî ameyî vîjnayene.