Denîze Poyraza ke 17ê hezîrane de bînaya HDPyî ya Îzmîrî de amebî qetilkerdene rojbîyayîşê xo yê 39. de serê gorê xo de ameye yadkerdene. Aktîvîteya rojbîyayîşî hetê Meclîsê Cinîyan ê HDPyî ra ameye serûberkerdene.

Dadîya Denîze Fehîme Poyraz, endamê keyeyê Poyrazî, Hemsereka HDPyî ya Îzmîrî Bedrîye Tekgur, Meclîsê Mayanê Haştîye yê Îzmîrî û Endamê Platformê 'Cinîyî Pîya Bîhêzêr Ê' tewrê aktîvîte bîyî.

Bedrîye Tekgur aktîvîteya yadkerdişî de qisey kerd û bale ante roniştişê 29ê kanûne yê qirkerdişî ser. Tekgure vat: ''Kiştoxî dewlete ra paştî girewte. Denîze do tim zerrîya ma de biciwîya. Ma do têkoşînê ci bîyarê ca û haştîye bîyarê Tirkîya.''

Fehîme Poyraz ard ziwan ke dişmenî waşt Denîze çin bikera la bi hezaran Denîzî weye bîyî. Fehîme Poyraz vat: ''Denîza mi Denîza pêro kurdan a. Wa heqê mi to rê helal bo. Mi soz da ke to ez do nêberma.''