Aktîvîsta TJK-Eyî Zeynep Dersime derheqê kampanyaya ‘Kişîyayîşê Cinîyan Polîtîk ê-Beno ke a ti zî bibîyêne’ de ANFyî rê qisey kerd.

Dersime bale ante ke şidetê hemverê cinî eslê xo de tenya hemverê cinî de nê, hemverê cimatî, xoza û kaînatî de yo û meseleyî ser o nê ardî ziwan: 

'GANÎ BI BALEANTIŞ QÎM NÊARÎYO; RAŞTE RA BÊRO WEDARTENE'

Sîstemê kapîtalîstî mîyanê cimatî de şidet açarno kulturêk û adeta kerdo perçeyêkê cuye. No kulturê şidetî xo hemverê cinî de ramojneno. Bi kampanyaya ‘Kişîyayîşê Cinîyan Polîtîk ê-Beno ke a ti zî bibîyêne’ yeno waştene ke cinî xo hemverê nê şidetî de organîze bikerê, bibê wayîrê hişmendîye. Goreyê îstatîstîkan Tirkîye de her 4 saetan ra reyêk cinîyî raştê tecawuzî yenê û maruzê şidetê camêrdî benê. Mesela, Almanya de zî hema hema her roje cinîyêk hetê mêrde yan zî partnerê xo ra yena kiştene. Bi na kampanya ma wazenê ke no problemo ke cimat de serê ci yeno girewtene, ma ê vejê meydan û tenya seba ke no şidet bêro vînayene nê, seba ke raşte ra wedarîyo çalakîyan virazê.   

TEWIRÊ ŞIDETÎ

Şidetê hemverê cinî çîyo ke hetê bêperwerdeyîye yan zî psîkolojîkî ra bêro îzahkerdene nêyo. No şidet polîtîk o û ewro hetê zafaneyî ra no hendî zanayene. Hetêna ra hema zî kişîyayîşê cinîyan binê sernameyanê ‘trajedîya keyeyî’ yan zî ‘mûzirîye’ de yenê  ercnayene. Bi nê hawayî no şideto ke eslê xo de polîtîk o û cimatkî yo seke şidetêkê şexsîyî ramojîyeno. Meseleyê şidetê cinsîyî zî wina ya. Aya ke raştê nê şidetî yena cinî ya, la nê meseleyî ser o zî nêno vindertene. No mesele meseleyanê tewr muhîman ra yo. Tu ganeyêk wayîrê heqî nêyo ke yewna ganeyî yan zî ganîye ser o şidet bica biyaro. Tenya yew pênaseyê şidetê cinî esto; o zî puyayîşo cimatkî û xerepîyayîşo exlaqî yo. Ganî her kes bieşko nê vajo: “Keso ke hemverê cinî de şidet bica ano bêexlaq o, puyaye yo.”    

ÇARÇIWAYA KAMPANYA DE HEDEF Û PLANÎ

Ma merkezê ci Ewropa 19ê Teşrîna peyêne de dest bi kampanyaya xo kerde. Xusûsen nê serranê peyênan de sere de Almanya Ewropa de zî şidetê hemverê cinîyan bi vêşî. Na kampanyaya ma do serrêk dewam bikero. Çarçiwaya kampanya de mîyanê nê wextî de çalakîyê aktîfî do bêrê organîzekerdene. Do derheqê şidetê hemverê cinîyan de fealîyetê tehlîlkerdişan ê tarîxkî, kulturkî, sîyasî û îqtîsadîyî bêrê rayraberdene. Heto tewr muhîm zî ma wazenê sazî û organîzasyonbîyayîşê ke do çareserîyanê mendeyan seba nê meseleyî bivînê virazê.

'VERÊ HER ÇÎYÎ LAZIMÎ BI ŞORIŞÊ ZIHNÎYETÎ ESTA'

Helbet mucadeleyê cinîyan bi serran o esto û netîce de cimatî mîyan de vurayîşêk virazîyayo. La no vurayîş resayo merheleya ke yena waştene? Nê. Seba ke ma vernîya şidetê hemverê cinî bigîrê verê her çîyî îhtîyacîya ma bi şorişêkê zihnîyetî esta. Ganî camêrd bizano ke meseleyê şidetê hemverê cinî de o zî perçeyêk o û nê meseleyî sey meseleyê xo bivîno.Cimato ke tede şidetê hemverê cinî esto û cinî azade nêya, kes nêeşkeno ûca qalê seypêyîye, edalet yan zî raştîye bikero.