Cinîyan ê HDPyî ke çarçeweya aktîvîteyanê fînalî yê Kampanyaya ''Têkoşînê cinîyan her ca de yo'' semedê Gulîstane Doku ya vînîbîyaye Dêrsim de ameyî têhet. Cinîyan  pankarta ke  bi kirdkî û tirkî  ser o xoverdayîşê cinîyan her de ro nuştebi kirişte û bi slogananê sey  ''cinî, cuye azadîye'' û ''qirkerdişê cinîyan polîtîk o'' qîrayî.

Dage: Têkoşînê cinîyan do ser bikewo

Parlamentera HDPyî ya Amedî Dersime Dag bale ante polîtîkaya hukmatî ya vera cinîyan ser û vat: ''Cinîyê ciwanî do vera zextê îqtîdarî de milê xo çewt nêkerne û roje bêro ke têkoşînê cinîyan ser bikewo.''

Başarane: Rîyê sîyasetê hukmatî ra Doku vînîbîyaye ya

Vervatoxa Meclîsê Cinîyan ê HDPyî Ayşe Acar Başaran zî vat: ''Êyê ke semedê vernîgirewtişê rayraşîyayîşê ma ameyî pêser, semedê vînayîşê Gulîstane Doku nêameyî pêser. Êyê ke bi bahaneyê pandemî nêverdenê ma çalakî bikerê ma hole zanê ke embazanê wextê pandemî senî bi derbkerdiş, destbend kenê. Gulîstane Doku bi aşmano vînîbîyaye ya. Dêrsimo ke bi kamerayan binê kotrolî de yo cinîyêka ciwanê nêvînenê. Kurdîstan de merdimî vînî nêbenê yenê vînîkerdene. No qewimîyayîş netîceya sîyasetê îqtîdarî ya.''

Aydenîze: Ma hemrayê Saraya xoverdayoxe yê

Hemsereka Pêroyî ya DBPyî Salîha Aydenîz zî bale ante vînîbîyayîşê Gulîstane Doku ser û vat: ''Înanê ke Gulîstane vînî kerde wa aye vînî. Cinîyî vera şima rixmê heme zextenê şima payra yê. Xoverdayîşê cinîyan do dewam bikero.'' Aydenîze ard vîrî Rojbîne Çetîne rê îşkence ameyo kerdene û vat: ''Ma hemrayê Sara ya ke Zîndanê Amedî tu kerd rîyê îşkencekaran rê, yê. Wa îşkencekarî naye xo vînî ra mekerê.''

Badê eşkerayîye çalakîya roniştişî ameye kerdene dima ra bi deyîran goveng ameye girewtene û finayîşê balonan çalakîye qedîyaye.