Dêrsim de Esma Kliçarslana ke 11ê adare de bîya vîn 7ê nîsane de meyîtê ci ame dîyene, meyîtê çawişê vînbîyayeyî Yilmaz Guneşî zî 44 rojan de dîya la hema zî Gulîstane Doku ra xeberêke çin a ke 123 rojan ra nata vînbîyaye ya. Tehqîqatê serebûtî de averşîyayîşêk çin o. Tehqîqatî de hêzê dewlete ''xokiştiş'' rêxistinê komelê sivîlî zî ''cînayet'' ser o vindenê. Serebûtî ra dima versûc Zaînal Abarakov rema teberê welatî û hêverî tehqîqatê Gulîstane hetê babîyê Abarakovî ra ameyêne îdarekerdene. Nê pêro şikê cînayetî zêdînenê.

Dêrsim de her ca de semedê ''asayîşî'' kamerayî estê la derheqê Gulîstane de dîmenêk zî çin o. No zî dano şikkerdene ke Gulîstane bîya qurbana cînayetêko plankerde. Tay dîmenê MOBESE zî estê ke nêzanîyenê aîdê Gulîstane yan nê. Keyeyê Dokuyî wazeno ke nê dîmenî bêrê zelalkerdene.

Cinîyan bi rojan o ke twitter de wazenê ke awa awbendanê Dêrsimî bêra vengkerdene û xebatê cigêrayîşî zî teberê awbendan de zî bêrê kerdene. Waka Gulîstane Doku Aygule Doku zî îfade kerd ke hînî cigêrayîşêko aktîf nêno kerdene.

Aygule Doku ard ziwan ke vîdeoyêkê derheqê vînbîyayîşê Gulîstane de destê înan de yo û vat: ''11:29 de nişena otobus, dîmenê saete 12:00-14:00 zî destê ma de yê. Ma nê dîmenî erşawitî kamca zî çewî zelal nêkerdî. Eke meyîtê çawiş Yilmazî mîtanê a awe de dîyeno gereka ê Gulîstane zî bêra dîyene.Seba Yilmazî cigêrayîşêko aktîf ame kerdene. Ganî seba Gulîstane zî bi nê hawayî cigêrayîş bêro kerdene. Eke nê ekîpê serdozgerîye û Suleyman Soyluyî awbendan mojnenê ganî awbendan veng bikerê. Babîyê Zaînal Abarakovî Engîn Yucel polîs o. Wezîfeyê Engîn Yucelî dîyayîşê sûcdaran o. Gulîstane mamostayê xo ra vat ke a şewe serebûtêkê derbe qewimîya la Engîn Yucelî qala ney nêkerde û heta îfadeyo zûrayên da. Şewe Yucel vengê polîsan dano vano ke tekelê ci kewtê mîyanê çamurî û şino. La semedo ke serê lajê ey de nasname çinbi şino. Eke keyeyê Yucelî vano ma bêsûc ê ganî vajo ke a roje ça de se kerdêne.

Derheqê roja vînbîyayîşê Gulîstane de mabênê saetanê 16:00-19:00 de dîmenê Zaînal Abarakovî çin ê. Nê saetan de Zaînal ça de bi? Ganî nê eşkera bibê. Wa nînan îsbat bikerê. Eke Engîn Yucel qisey bikero ma kênaya xo cayêkê bînî de gêrênê. Eke vanê ma masûm ê wa pêro dîmenan bidê çapemenîye. Dîmenê Zaînalî çapemenîye de zî çin o.''