Roniştişê dewaya vera betalkerdişê Peymana Îstanbulî ya ke vera Serekkomar Erdogan amebî akerdene, vizêr ame kerdene. Roniştişî ra dima rêxistinanê cinîyan verê Şuraya Dewlete de eşkerayîye daye.

Eşkerayîye de Platformê Cinîyan ê Seba Têdûştîye (EŞÎK) Selîne Napikoglu ard ziwan ke 14ê hezîrane de ê do reyna tewrê roniştişî bibê û Peymana Îstanbulî ra fek vera medê. Reyna EŞÎKî ra Hulya Gulbahar vat: ''Ma seba rûmet û cuya têdûşte têkoşîn kenê. Ma rûmetê xo nêdanê kesî.''

Avûkate Mujde Tozbey nameyê Komeleya Domanan û Cinîyan ser o qisey kerd û da zanayene ke ê 20 keyeyan reyde ameyî.

Waya Remzîye Tuysuza ke Îzmîr de amebî kiştene Mutlu Can Tuysuz vat: ''Waya mi raşta şîdetê camêrdan ameye la polîtîkayanê dewlete ra no şîdet nêqedîyeno. Ma do vera ney têkoşînî rê dewam bikerê.''

Wara Remzîye Yoldaşa ke Amed de kişîyabî Asîye Tura vat: ''Waya mi rixmê bira pawitişî zî kişîyaye. Ma wazenê Şureya Dewlete birêka ke do ma kêfweş bikera, bida.''

Avûkate Şenele Sarihan, Endama Heyetê Serekîya Partîya Çepe Îlknure Başer, Endama EŞÎKî Berrîne Sonmez zî eşkerayîye de qisey kerd û dîyar kerd ke ê do Peymana Îstanbulî ra fek vera medê.

Eşkerayîye bi sloganê 'Ma heq û cuya xo war nêverdê' qedîyaye. Roniştiş taloqê 14 û 28ê hezîrane ame kerdene.