Gerîlayê HPGyî Veysel Bagir (Kajîyan Amed) 2016 de Avaşîn de şerê vera dewleta tirke ya îşxalkere de şehîd bibi. Nasnameyê Kajîyan Amedî 28ê temmuza 2022yî de amebi eşkerakerdene. Naye ra dima keyeyê Kajîyanî  Licê de Şînxaneyê Karahasanî de tezîyeya xo naye ro la Qeymeqamîya Licê tezîye wedarnaye.

Dadîya Kajîyan Amedî Havva Bagir derheqê babete de Jinnewsî rê qisey kerd. Dayîke Havva Bagir da zanayene ke lajê ci dima ke Pirsûs de 33 ciwanî ameybî qirkerdene  a şewe tewrê gerîlayan bîyo.

Dayîke Haavva Bagir vat: ''Lajê mi televîzyon de dî ke 33 ciwanî ameyê qetilkerdene û zaf hêrs bi. A şewe saete 12 de keyeyî ra vejîya dima ma tira xeberêke nêgirewte. Asayîşî çend reyî venga ma da, lajê mi pers kerd. Rojêke înan reyna venga mi da û fotografê ey mojna mi vat 'No lajê to yo, nameyê ci Kajîyan o.' Çend serran ra dima ez musaya ke lajê mi şehîd bîyo. Lajê mi seba şarê xo tewrê gerîlayan bi. Ez pê lajê xo sereberz a. Rayîrê ey rayîrê namûs û rûmetî yo. Lajê mi dizdîye nêkerda, xirabîye nêkerda. Ey seba şarê xo ganê xo feda kerdo.'' 

Dayîke Havva pare kerd ke înan xebera şehadetî ra dima cade tezîyeya xo naya ro û vat: ''Roja verêne û diyîne nê roja hîrêyîne de qeymeqamîye vat 'gerre est o' û kerd ke ma tezîye wedarnê. Ma bire daye ke keyeyê xo de tezîyeya xo bikerê. Ê hema tezîyeya ma rê tehamul nêkenê. Hem domananê ma kişenê hem zî tezîyeya ma qedexe kenê. Na neheqî ya. Seba ke ma kurd ê, ê ma rê wina kenê.  Ê kenê ke ma rê bindestîye ferz bikerê. Yenê hêrişê goranê ma kenê. Ma se kerdo înan? Cara domanê ma şehîd bîyê. Goranê domananê ma rê tehamul nêkenê. Ez do rayîrê lajê xo ser de şora. Wa çew vera hêrişanê serê goran bêveng nêmano.''