Mêrdîn de domanêke adara 2023yî de raştê tecawuzê merdimê xo N.Ç.yî amebî. Domana ke nê tecawuzî ra digane bîye û gerûşêko merde ard dinya 16ê çeleyî de bi îdîaya 'kiştişê qestî' ra tepişîyabî. Domana ke hetê merdimê xo N.Ç.yî ra  raştê tecawuzî ameye rşyê tehdît û zextanê ey ra gerreyê ci nêkerd û tecauwzkar N. Ç. serbest amebi veradayene.

Naye ser o domane 4ê adare de zîndanî ra Serdozgerîya Komare ya Mêrdînî rê mektûbêk şawit û çîyêk ameyo ser qala ci kerd. Domane vat tarîxanê cîya cîyayan de hetê M.Ç. û M. S. O.yî ra zî raştê tecawuzî ameye. Badê gerreyê domane serdozgerîye  îfadeyê N.Ç., M.Ç. û M. S. O.yî girewt û reyna veradayî. Serdozgerîye 20 gulana 2024 de qerar girewt ke derheqê kerdoxan  de ''delîlê qîmkerdeyî''  çînê û dosya qefilnaye.

Platformê Cinîyan ê Şahmaranî yê Mêrdînî ra Gulîzare Îpek derheqê babete de ANFyî rê qisey kerd. Gulîzare Îpek ard ziwan ke rixmo ke domanê bi mektûbî her çî dozgerîye rê vat muhekemekerdişo bitesîr nêame kerdene, tecawuzkarî serbest veradayîyayî û vat: ''Domanêka raştê tecawuzê sîstematîkî ameya û netîceya nê de gergûşo merde ard dinya, bi sûcdarîya mergê gerguşî 7 mengî yo zîndan de yena tepiştene. Dewlete kiştox û tecauzkaran pawena, ceza dana mexdûran. Îqîtdarê AKP-MHPyî keno ke komel de tacîz û tecawuzî bikero meşro. Pîya bi polîtîkaya qirkerdişê cinîyan,Kurdîstan de tacîz û tecawuz sey konseptê şerê taybetî yeno destgirewtene.''

Gulîzare Îpek vat: ''Ma sey dezgehanê cinîyan ê Mêrdînî do prosesî teqîp bikerê. Ma do sey Platformê Cinîyan ê Şahmaranî semedê paştdayîşê domane kampanyaya mektuban bidê destpêkerdene. Ganî paştdayîşo huqûqî û psîkolojîk bidîyo na domane. Ganî helêke cuwa ver zîndanî ra bêro vetene. Rixmo ke 7 mengî yo zîndan de hema wextê mehkemeya ci bewlî nîyo. Ma do semedê paştdayîşê aye çîyo ke destê ma ra yeno bikero. Kerdoxî hema teber de serbest gêrênê. Ma nê qebul nêkenê. Domane nika xo têna û bêwayîr hîs kena. Ma do aye têna meverdê û wayîrê ci bivejîyê.''