Endama Koordînasyonê Warê Ekonomî yê Kongreya Starî Dîcle Ezda cewab da persanê ANFyî û pare kerd ke karê ekonomîya cinîyan ê Rojawanî xo di bingeyan ser o awan kenê. Derheqê nê wird polîtîkayan de Ezda vat: ''Cinîyê bêkar, xizanî û teberê berardişî de vera dîyayeyî tewrê berardişî yenê kerdene. ''

Ezda qiseykerdişê xo wina dewam kerd: ''Ma armanc kenê ke cinîyan rasta rast bikerê hezê ekonomî û bi naye ekonomîya cinîyan a komunale aver berê. Tek rayîrê naye zî no yo ke cinîyî ganî binê wayîrê têkilî û waranê berardişî. Yanî bazarê ekonomî yê cinîyan do bêro rêxistinkerdene. 

Karê ekonomîya cinîyan ê xoseran ê vera serdestîya camêrdan do ekonomî demokratîk bikero. Cinîyî bi karanê xo yê komelkîyan û demokratîkkerdişê ekonomî Rojawan de rolêkê tarîxîyî anê ca.''

Dîcle Ezda derheqê karanê kooperatîfê cinîyan de zî wina vat: ''Kooperatîfê cinîyan vera ekonomîya kapîtalîste tek metodê ekonomîya komelkî yo. 22 kooperatîfê zîretî yê cinîyan estê. Babetanê cîyayan de zî 18 kooperatîfê ma estê. Bi rayîrê nê kooperatîfan cinîyî tewrê hêzê kede benê. Ameyeyo ke kooperatîfan de yeno destvistene, bi hawayêkê têdûştî yeno parekerdene.''

Dîcle Ezda bale ante ser ke îşxalê dewleta tirke bi hawayêkê giranî tesîrê ekonomîya cinîyan kenê û vat: ''Îşxal seba cinîyan trajedî yo. Îşxal, vurnayîşê demografî bîyî sebeb ke ekonomî binî ra çin biba. Multecîtîye zî bêekonomîbîyayîş o. Keda merdiman, ekonomîya komelkîye yenê talankerdene. Seba ke ma kampan de ekonomîya cinîyan biafernê planê ma estê. Ma do seba cinîyanê Serêkanîyê kooperatîfan awan bikerê û cinîyan bikerê wayîrê hêzê ekonomî. Şehba de karê kooperatîfê zîretî dîya destpêkerdene.''