Dîlok de cenazaya cinîyêke ameye dîyene. Êlih de zî cinîya bi nameyê Sultane Karabulut hetê mêrdeyê xo Dogan Demirî ra ameye kiştene.

Taxa Belikise ya qezaya Şehîdkamîlî yê Dîlokî de cenazaya cinîyêke ameye dîyene ke bi aletêkê birnayîşî ameya qetilkerdene. Cenzaya ke erazîya venge de ameye dîyene û nasnameyê ci hema zelal nêbîyo, goreyê cigêrayîşê verênî ci rê îşkence ameyo kerdene.

Êlih de zî cinîya bi nameyê Sultane Karabulut hetê mêrdeyê xo Dogan Demirî ra ameye kiştene.  Goreyê zanayîşanê ke ameyî girewtene Demirî taxa Çalitepe de pê çeke hêrişê keyeyêkî kerd. Netîceya hêrişî de Sultane Karabulut û waya ci Muzeyyene Karabulut xeylêk cayanê xo ra birîndar bîyî. Sultane Karabulut cayê qewimîyayîşî de dinyaya xo bedilnaye û waya ci zî nêweşxena de serwîsê ciewnîyayîşê giranî de ya.

Merkezê Heqanê Cinîyan ê Barûyê Êlihî da zanayene ke Karabulut verê qetilkerdişî polîsan rê gerreyê Dogan Demirî kerdbi. Merkezê Heqanê Cinîyan hesabê xo yê Twîtterî ra nêrazîbîyayîş ramojna û vat: Reyna cinîyêke ameye qetilkerdene. Qetilkar Dogan Demir hema nêameyo tepiştene. Rixmo ke Karabulute gerre kerdbi nêameye pawitene.