Dosyaya Gulîstane Doku de averşîyayîşêko newe

Dîya zanayene ke Cemîle Yucera ke dadîya vergumanê yewinî Zainal Abarakovî ya, CÎMERî rê waştişname nuşt û îfade kerd ke ê wazenê vejîyê teberê welatî.

Wendekara Zanîngehê Munzurî Gulîstane Doku 5ê çeleyê 2020î ra nata Dêrsim de vînîbîyaye ya. Dosyaya Gulîstane de averşîyayîşêko newe esto.

Goreyê xebera Rojnameyê Ozgur Gundemî Cemîle Yucera ke dadîya vergumanê yewinî Zainal Abarakovî ya, CÎMERî rê waştişname nuşt û îfade kerd ke ê wazenê vejîyê teberê welatî.

Cemîle Yucer waştişnameyî de wina vat: ''Mi lajê xo serebûtî ra verî, bi agahîya walî û selahîyetdaran şawit Rûsya. Wexto ke no serebût çapemenîye de dest pêkerd birêz wezîrê karanê zereyî ma rê vat lajê xo berê yîta, nêbo dest pê serebûtan bikerê, berê Tirkîya. Ma o şawit, ma ard. Keremê xo ra Birêz Serekkomar ma wazenê welatî ra vejîyê.''

Derheqê waştişnameyî de Serekê Baroyê Dêrsimî û avûkatê dewa Kenan Çetînî vat: ''Cemîle bi kilmî wazena 'kontrolo edlî bêro wedaritene.' Dosya de cara kontrolo edlî çin o. Yanî deerheqê keyeyî de bira qedexekerdişê îdareyî esto, tebervejîyayîş qedexe yo. Ma nê waştişnameyî ra fam kenê ke Zainal verî ke medya de ame mojnayene şîyo Rûsya. ''

Kenan Çetînî da zanayene ke dest nêdîya telefonê Zainalî ser û keyeyê ci de cigêrayîşê sûcî nêame kerdene. Çetînî vat: ''Ma destpêkî ra nata vanê ke Zainal verguman o. Ganî na dosya newe ra bêra ercnayene. Babîyê ey yanî vergumanêko bîn mudirîya polîsan de xebitîyeno. Nika keyeyê Dokuyî seba tehqîqatêkê bitesîrî amadekarîye keno ke muracatê Mehkemeya Heqanê Merdiman a Ewropa bikero. Beno ke dosya şêra Mehkemeya Qanûnê Bingeyî. Ma dozgerîye ra wazenê ke çarçewa nê dokumentanê neweyan de dest pê tehqîqatêkê bitesîrî bikerê.''