Hemşaredara Sarayî Dumane rêjê se ra 70 ameye weçînayene labelê hetê îqtîdarî ra dest nîya şaredarîye ser. Dumane pare kerd ke îqtîdaro ke pê operayonê leşkerî nêeşkena netîce bigêro, pê metodanê cîyayan hêrişê îradeyê şarî keno.
Vakurê Kurdîstanî û Tirkîya de weçînayîşê herêmî yê 31ê adara 2019î de HDPyî Wan zde 10 şaredarî vistî destê xo. Labelê hewteyê destpêkî de îqtîdarê AKPyî pê bahaneya 'nazmey pê biryarnameyî wezîfe ra amebi dûrvistene' dest na şaredarîyanê Artemêtam, Tûşba û Ebexî ser. 19ê tebaxa 2019î de dest nîya Şaredarîya Wanî û dima 6 şaredarîyanê HDPyî ser.
Nê şaredarîyan ra yew zî Şaredarîya Sarayî bîye ke HDP pê rêjê se ra 70 vistbi dest. Herinda Hemşaredare Cazîye Dumana de qeyûm ame tayînkerdene.
Dumane îfade kerd ke îqtîdarê AKPyî çîyo ke pê operasyonanê leşkerîyan nêeşkeno bikero pê destsernayîşê îradeyê şarî wazeno bikero û vat: ''Bi taybetî pê biranê MGKyî yê serra 2014î xîret keno ke planê xo bîyaro ca. Planê teda, şîdet, kiştiş û çinkerdişî... Şaredarîyan de ke qeyuman dest nîya ci ser, wazeno deskewteyanê şarî werte ra wedaro, îmkananê şarî pêşkêşê terefgîranê xo bikero, îhaleyanê nêheqan pêşkêşê terefgîranê xo bikero. Çîyo ke ci ra yeno talankerî ya.''
Dumane ard ziwan ke personelî zî teber de ameyî veradayene û da zanayene ke bi taybetî personelê leşkerî mudirîyan de ameyî cakerdene û vat: ''Bi nê hawayî wazenê ke îdareyanê heremîyan de îradeyê şarî çin bikerê. AKP wazeno komelêko serenerm biaferno.''
