Endama Koordînasyonê PAJKî Ronahî Serhat Endamê Meclîsê PAJKî Bêrîvane Zîlana ke 17ê hezîrane de Herêmanê Pawitişî yê Medya de hêrişê artêşa tirke de şehîde bîye, yad kerd.

Ronahî Serhata ke Jin TVyî rê qisey kerd verî şexê Bêrîvane Zîlan de heme şehîdî yad kerdî û vat: ''Raştîya Kurdîstanî de her şehadet manayêko gird îfade keno. Her şehadet bêşik tarîx de pelekê neweyî akeno. Ameyoxê ma roşn keno. Ma deyndarê şehîdanê xo yê. Wextê ronayîşê partîye ma ra şehîdê ma est ê. Seba ke ma şehîdan rê bibê cewab, çalakîyê girdî hewce kenê.

Embaze Bêrîvane netîceya îxanetî de şehîde bîye. Dişmen şero ke ewro Behdînan û waranê bînan de dewam keno de wazeno bi îxanetî ser bikewo. La ma sozê azadîye dayo şehîdanê xo, ma do sey înan biciwîyê û bimirê. Embaze Bêrîvane Zîlana ke 1991 de tewrê têkoşînî bîye tim xeta Rayberîye esas girewte. A zerrîya safî ra pabesteya azadîye bî. Hem koyanê Kurdîstanî de hem zî waranê bînan de serêkşîye kerde. Bi serran tengayîyê pîlî dîyî û tim semedê serkewtişî cehd kerd.

Sere de Gelîyê Zîlane semedê qikerdişanê Kurdîstanî vera dişmenî hêrsbîyaye bî û zaf kînê ci bibi. Embaze Bêrîvane bi heskerdişê pîlî pabesteya Rayberîye bî û coka azadîya fîzîkeye ya Rayberîye hedefanê aye yê tewr girdan ra yew bi. Ma zî sey mîlîtananê na partîye semedê nê hedefî têkoşîn kenê la embaze Bêrîvane waştêne nê têkoşînî rê serkêşîye bikero. Semedê nê keda pîle daye. Şehîde Bêrîvane nameyê Binevşe Agal (Bêrîvane) girewtbi û waştêne sey aye serkêşîya serhildananê şarî bikero.  Partîde xeta Zîlanan de têkoşîn kerd û rolêko serkêş kay kerd. Embaze Bêrîvane bi felsefeya azadîye ciwîyaye. Hetê embazanê xo ra zaf ameyêne heskerdene. Ma embazêka delale vînî kerd la ma çirey şehîdanê xo tarîx de nêverdenê. Ma do înan tim bidê ciwîyayene.

Embaze Bêrîvane têkoşînê azadîye yê cinîyan de rolêko muhîm kay kerd.  Wextê tewrbîyayîşê xo ra nata Serhed, Xakurkê, Zagros û Herêmanê Pawitişî yê Medya de bîye gerîlayêka serkêşe û fermandarêka qehremane. Eynî wextî semedê perwerdeyê embazanê xo keda pîle daye. Bedilnayîşê zîhînkî de rolêko pîl kay kerd. Coka Akademîya Zeynepe Kinaci de bi keyfî dersa tarîxê Kurdîstanî  û Têgêrayîşê Azadîye dayêne. Nê dersan de pîya bi emzanê xo aye xo zî newe kerdêne. Ma do sey tegêrayîşê azadîye yê cinîyan do çirey embaze Bêrîvane xo vîrî ra mekerê. Ma do tim wayîrê keda aye vejîyê.

Ma zanê ke nê hêrişî vera xeta azadîye ya cinîyan benê. Dişmen wazeno na xete çîn bikero la na xete hinda Kurdsîtan de yew felsefe, tewir, îrade ya. Koyan ra heta bajaran û heme dinya ra na xeta azadîye bila bîya. Çew nêeşkeno xete ewro ra tepîya têna bi hêrişanê leşkerî werte ra wedaro. Coka ganî ma şerî bi serewktişî biqedînê.''