Rayberê Şarê Kurdî Abdullah Ocalanî ser o tecrîdêko girankerde esto. Tewr peynî birayê ci Mehmet Ocalanî 11ê êlula 2016î de dîbi. Parlamentera HDPyî wa Wanî Bedîa Ozgokçe Ertane tecrîdê Îmrali ser o ANFyî rê qisey kerde.

‘REJÎMÊ ÎMRALI QET HUQÛQÊKÎ NÊŞINASNENO’

Ertane dîyar kerde ke tecrîd roja verêne ra heta ewro game bi game beno giran û wina va: “Bitaybetî zî 5ê nîsana 2015î ra nata tecrîdêko xorîn esto. Rejîmê Îmrali sey rejîmêko xoser têgereno. No rejîm qet huqûqêkî nêşinasneno. La ma heme zanê ke rixmê heme hêrîşanê dewlete Birez Ocalan senî îradeyêko xurt nîşan dano û sere nêroneno. Xora Birez Ocalanî bi roja verêne ra plananê înan pûç vetî.”

'PERSPEKTÎFÊ OCALANÎ SEBA ROJHELATÊ MÎYANÊNÎ ZAF MÛHÎM Ê'

Ertane wextê muzakereyan viste vîr û wina domnaye: “Serranê 2013 û 2015î de bi pêvînayîşanê muzakere berê Îmrali abîyî. Pêvînayîşê Heyetê Îmrali, o wext gamêka girde bî. Nê pêvînayîşan vernîya sîyasetê tirkî zî akerd. Reyna perspektîfê nê pêvînayîşan seba peroyê şaran û Rojhelatê Mîyanênî zî zaf muhîm bî. Dewlete herinda aştîye de polîtîkaya şerî viste dewre. Ewro tecrîd sînoran vîyarnayo û heme saran sero yeno domnayene. Dewleta tirkî her leteyê Kurdîstanî de hêrişê şarî kena û wazena ke qezancanê kurdan çinî bikera.”

‘GANÎ HER KESE VERA TECRÎDÎ BIVEJÎYO‘

Ertane eleqe ante muhîmîya rolê Ocalanî ser û wina qedênaye: "Wazenê ke Birez Ocalan û şarê kurdî teslîm bigîrî. Şarêk û bi milyonan merdimî Ocalanî sey îradeya xo vînenê. Tecrîd tena Îmrali de nê, îradeya şaran ser o yeno domnayene. Ganî herkes vera nêyî de bivejyî û vengê xo berz bikerê. Ma zî sey HDP seba wedarnayîşê tecrîdî têgerenê. Şiknayîşê tecrîdî seba ameyeyê ma pêroyî zaf muhîm û erjaye yo."