Endaman Koordînasyonê KJKyî Besê Erzîncan programo taybet ê Medya Haber de persê Mustafa Karamanî cewab kerdî. Erzincane ard ziwan ke PKK Kurdîstan de hêzê azadîye yo bingeyên o ke merdimo/a azad/e aferneno. Projeyêkê ci yo alternatîf esto ke serkêşîya ci Rayber Apo keno. Coka ci rê hêriş yeno kerdene.

Xoverdayîşê 14ê Temmuze dewrêko newe da desptêkerdene

''Erzîncane bi yadkerdişê şehîdan dest pê qisey kerdişî kerd û nê vatî: ''Xoverdayîşo Pîl ê Rojeyê Mergî yê 14ê Temmuze vera polîtîkaya qirkerdiş, îmha û înkarî yê faşîzmê 12ê Êlule bi. Serkêşîya  embazan  Kemal û Hayrî de xoverdayîşê pîlî dest pêkerd û bi nê xoverayîşî hamleyêka newî ameye destpêkerdene. Dima ra Rayberîya ma hemleya 15ê Tebexe da destpêkerdene ke newe ra ganîbîyayîşê kurdan a. Na çarçewe de ma sere de embaz Mazlûm Dogan Xoverdayîşê 14ê Temmuze bi hurnet selam kenê. Mîyanê nê xoverdayîşî de sere de Sakîne Cansiz xeylêk hemrayê cinîyî estbî ke destpêkerdişê xoverdayîşê ma temsîl kenê.

Hêrişê vera Heftanînî vera heme kurdan o

Dewleta tirke ya ke polîtîkaya qirkerdişê kurdan rayra bena wazena bi polîtîkaya qirkerdişî payra bimano. Vera kurdan her hetî ra hêrişê xo zedînayî. Dewlete tirke semedê hekîmîyetê xo yê Rojhelatê MÎyanênî sere de kurdan, asûrîyan, ermenîyan heme şaran asîmîle kena, qir kena. Erdogan û MHP wazenê ke bi nê hêrişan emre xo bineyna derg bikerê. Coka hêrişê îşxalî yê vera Heftanînî da desptêkerdene. Têgêrayîşê ma PKKyo ke ewro hêzêko pîl o ke dinya de sey aktorêkê sîyasî  muxatab yeno girwetene estbîyayîşê kurdan newe ra ganî kerd. Bi hêrişê Heftanînî wazenê ke PKKyî bikerê zehîf, temamî de çîn bikerê. Gerek no zaf hole bêro zanayenê ke no hêriş têna vera PKKyî nê vera heme kurdan o .

PDK paştî dano îşxalkeran

Eke PDK paştî nêdo dewleta tirke ê nêeşkenê wina rehet bêrê Heftanîn de hêriş bikerê. Na raştîye rayapêroyî zî heme dinya zana. Konvoyê leşkeran sinor ra ravêrenê yenê. Baregehê ke dewleta tirke bi destûrdayîşê PDKyî herême de viraştî înan ra herêmanê gerîlayan rê hêriş yeno kerdene. Ne PDK û ne Iraq wa mevajê teberê ma de nê hêrişî benê bi paştdayîşê înan hêriş kenê. Ma eşkenê vajêke PKK têna vera dewleta tirke nê vera hêzanê hegemonîkan şer keno. Mîyanê nê de partîya kurdan zî esta. No operasyon bi paştdayîşê Amerîka û hêzanê hemkaran ê herême yeno kerdene. PKK Kurdîstan de hêzê azadîye yo bingeyên o ke medimo/a azade/e aferneno. Projeyêkê ci yo alternatîf esto ke serkêşîya ci Rayber Apo keno. Coka ci rê hêriş yeno kerdene. No hêriş vera kurdîtîya azade, cinîya azade û merdimîye yo. Eke PKK bêro zehîfkerdene hêzê demokrasîyî yê bînî zî benê zehîf. Şexsê PKKyî de heme şaran hedef genê. Hefefêko muhîm zî Îran o.

Gerîlayê Kurdîstanî vera  hêzê NATO serkewte yê

Sere de Heftanîn heme koyanê Kurdîstanî de xoverdayîşêko serkewte esto. Rixmê heme îmkananê tekînîkîyan gerîlayê PKKyî  her ca de vera hêzê NATO xoverdayîşêko xurt ramojnenê. Yew gerîlaya/ê ma bedelê hezar tankanê dişmenî yo. Merdimê tewr pak, pabeste û fedakarî yê Kurdîstanî sefanê azadîye de yê. Merdimê tewr xoverdayoxî yê Rojhelatê Mîyanênî sefanê ma de yê. Coka no xoverdayîş do miheqeq ser bikewo. Gerîlayanê PKK, gerîlayanê HPG û YJA Starî rayîrê gerîlabîyayîşê modernîteya demokratîke de aver şinê. Ma xoverdayîşê gerîlayan selam kenê. Xora xoverdayîşê şarê ma zî esto. Dormeyê gerîlayanê kurdan de yewbîyayîşêko pîl esto. Ewro her hetê dinya ra her îtîqat û şaran ra tewrbîyayîşê PKKyî estî.

Cinîyê kurdan serkêşîya têkoşînî kenê

Cinîyê kurdan ewro warê sîyasî û komelkî de, gerîla de heme xebatan de rolêko pîl kay kenê ke têkoşînê azadîye de hêzo bingeyên ê xoverdayîş û azadîye yê. Heme dinya şexsê YPJyî de qehremanîya cinîyan ê kurdan dî. Hedef girewtişê cinîyan 2013 de bi suîqestê vera embaze Sakîne Cansiz dest pê kerd. Tewr peynî de Rojawan de endamê Kongre Starî rê, Efrîn de, Vakurê Kurdîstanî hêrişê vera cinîyan ameyî kerdene. Şexsê cinîyan de wazenê têkoşînê azadîye biqedînê. Cinîyê kurdan do çok nêdê û xoverdayîşî rê serkêşîye bikerê. Miheqeq Kurdîstano azad do bêro ronayene.''