Endama Koordînasyonê KJKyî Besê Erzîncan derheqê têkoşînê  cinîyan de serra 2019î ercnaye.

Ercnayîşê Erzîncane wina yê:

"No esasêk o ke ma sey cinîyan seserra nikayêne tarîf bikê û planan bikê û xo rê armanc bikê ke ameyox de ma do çi bikê. Fikirîyayîş, têkoşînê xobîyayîşî, xîretkerdiş bi serkewtişî netîce beno. Naye ra ganî ma reya verêne israr bikê ke serra 2020î seba cinîyan biba serra destkewteye. Ganî cuya ma û fikrê ma yewbînan bitepişê, paştî bidê yewbînan. Mefteyê azadîye xo ra destpêkerdiş o. Seke Rayber Apoyî pawitişanê Îmraliyî de mojna konfedaralîzmo demokratîk, modelê xoserîya demokratîke û paradîgmaya cinîya demokratîke-ekolojîke- azadîkere çare bi hawayêkê eşkera erzena meydan.25ê Teşrîna Peyêne Roja Têkoşînê Vera Şîdetê Serê Cinîyan bi tewrbîyayîşê girseyanê cinîyan vîyarte. Dinya ser o rojdemêko bîn ê 25ê teşrîna peyêne zî pawitişê Şorişê Rojawanî bi.

Ma dewirêk de yê ke Tirkîya de sere de HDP cinîyê CHPyî, cinîyî partîyanê Îslamgîran û hetta cinîyê AKPyî do hîna zêdêr wayîrê têkoşînê cinîyan bivejîyê. Cinîyê Kurdîstanî bi erjanê xo paştî danê pêro têkoşînanê cinîyan. Cinîyê kurdî ganî paştî bidê pêro çalakîyanê cinîyan û çalakîyanê xo zî her cografya de aver berê. Ganî cinîyê Tirkîya zî wina bikê. cinîyî bi pawitiş yan zî têna bi nêrazîbîyayîşan ney bi awankerdişê alternatîfan do bixelisê. Cinîyî eşkenê ke çalakîyanê yewbîyayeyan zî bikê.

Têkoşînê cinîyanê kurdan bi grevê vêşanîye yê Leyla Guven û bi xoverdayîşê cinîyanê Rojawanî yê vera îşxalê dewleta tirke aver şi. Seba ke ame zanayene ke Şorişê Rojawanî şorişêkê cinîyan o, pêro cinîyî dinya seba pawitişê Rojawanî yew ca de ameyî pêser û înan vera hegemonya pîya şer kerd.Ganî tewirê azadîye yê gerîlayanê YJA-Starî baş bêro dîyene û ercnayene. Her gerîla sembola serewedaritişê vera sîstemê pederşahîye ya. Gerîlayê cinîyî çimeyê têkoşînê azadîye yê cinîyan ê. Şerê gerîlayanê ma pêro dinya ser o tesîr keno. Serra 2019î de gerîlayanê ma bi xoverdayîşê xo mojna ke ê banderîya camêrdan û dewlete red kenê.

Bi nê hewayî serra 2019î de gerîlayanê ma yê cinîyan reyna bi hawayêkê xurtî îfade kerd ke ê israr kenê û qerardar ê ke cuyêka azade û newîye awan bikê. Xoverdayîş û înşa do cinîyan bixelisnê. Ma mîyanê prosesêkê winasênî de yê ke têkoşînê cinîyanê dinya yewbînan rê benê nêzdîye. Jineolojî bi rayberîya cinîyan rojdemê pêro cinîyan de yo. Ma bi Jineolojî rayîr ra şinê. Bi averşîyayîşê jinoelojî û xebatanê îdeolojîkan ma verê xo hîna zelal vînenê û xebatanê xo hîna xurtêr kenê.

Eke ma têkoşînê cuya azade xurt nêkê, vera trajedîyanê dinya nêrazîbîyayîşê xo nêmojnê ma zî do bibê berpirsîyar. Nê esasî ser o ma qerardar û isrardar ê ke seba cinîyan cuyêka newîye awan bikê. Tay xebatî estê. Cinîyî payan ser o yê. Hêvîya ma zixm a. Ma xîret kenê ke ser bikewê. Ma do bi xoverdayîş û têkoşînî serra 2020î bikê serra azadîya cinîyan. Ma vajê, serra 2020î serr a ke cinîyî do azad bibê."