Endama Koordînasyonê KJKyî Besê Erzîncan derheqê vîrusê Korona de ke pêro dinya rê gef waneno ANFyî reyde qisey kerd.

Qiseykerdişê Erzîncane rabeşêk wina yo:

''îhtîmalêko pîl o ke vîrusê Korona hetê sîstemê hegemonîkî ra seba ke verê têgêrayîşanê ekolojîkan, demokratîkan, azadîperweran bêro girewtene, muxalefet bêro pûçkerdene ame vilakerdene. Ma eşkenê vajê ke aslê xo de hêzê demokrasîyî tesîrê nê vîrusî de manenê. Xora vîrus çend zî tesîr bikero nêeşkeno ke bi hawayêkê giranî tesîrê serdesta bikero. Merdimîye ver bi konfederalîzmê demokratîkî, neteweyê ekolojîkî-demokratîkî şîyêne. Sîstemo hegemonîk coka hesabanê bidetayan keno. 

Bi nê hawayî sîstemê hegemonîkî armanc kerd ke bi bahaneya na nêweşîye komel hîna zêdê muhtacê dewlete bibo. Naye ra ma eşkenê vajê ke nêweşîya janî ya vîrusê Korona hetê sîstemê hegemonîkî ra virazîyaye. Vera Rayberê ma tecrîdêko mutlaq yeno kerdene, nika zî vera pêro merdimîye tecrîdêko winasên yeno kerdene. Mumkîn nîyo ke têkilîya nê her di rewşan nêra dîyene.Pê nê vîrusî yeno waştene ke muxalefet û serewedaritişê dinya bêro qedînayene û sîstemo hegemonîk rehet bibo. Pê nê vîrusî kokimî yenê hedef kerdene ke vîrê merdimîye yê. Sîstemo hegemonîk komel bêvîr verdeno.

Cinîyî, pêro hêzê azadî û demokrasîyî ganî ser o bivinderê ke xo senî vîrusî ra bipawê û tedbîran bigêrê. Heman wextî de têkoşînê azadîye ser o zî vinderê ke no têkoşîn senî bêro kerdene, paştdayîş senî bibo, sîstemê hegemonîkî senî eşkenê binkerdene û senî eşkenê yeîya komelî bîyarê ca. Ganî merdimî payan ser o vinderê û abigêrê xo ser. Ganî ma nê şokî ra xo bixelisnê û têkoşîn ser o vinderê.Zaf eşkera yo ke merdimî têna pê paştdayîşî eşkenê heqê nê vîrusî ra bêrê ke bîyo belayê sereyê merdimîye. Ganî şarê ma wayîrê yewbînan bivejîyê.

Tîya de reyna girîngîya xoîdarekerdişî, cuya tabîye vejîyena werte. Yeno famkerdene ke modelê neteweyê demokratîkî, awankerdişê meclîs û komanan çend girîng ê û hewce yê. Ganî her taxe, dewe, şaristan tedbîranê xo bigêro û hetkarîya yewbînan bikero. Weşîya xo, asayîşê xo meverdê destê dewlete. Dewlete nêdana ciwîyayene, dewlete kişena. Eke dewlete çîyêk bikera zî seba meşrûtîyetê xo, îqtîdarê xo yê qeyûmî kena. Coka ganî ma metodanê neweyan ê têkoşînî bivînê, xo rêxistin bikerê.Rolê çapemenîya azade nê prosesî de tarîxî yo. Beno ke heta nika tarîx de çapemenîye hende stratejîk nêbîya. Hêzê demokrasîyî û azadîye ganî nê prosesî de ke krîzê merdimîye giran beno, bieşkê ke pê taktîk û stratejîyan destkewteyan bivisnê destê xo. 

Ma senî eşkenê têkoşînê azadîye hîna zêde geş bikerê? Ganî merdimî payan ser o vinderê, xo perwerde bikerê, amade bikerê, şertan biercnê û destê ci ra çi yeno bikerê. Rayîro çareserîye yo ke Rayberîya ma pawitişê xo de eşkera kerd ma nika holêr fam kenê. Ma reyna pawitişan biwanê, fam bikerê û bîyarê ca. Eke her kes bifikîro, hêvî, bawerî û moralê xo pît bikero ma eşkenê heqê her çîyî ra bêrê. Pê paştdayîşî ma eşkenê heqê nê rojan ra bêrê.''