Endama Koordînasyonê KJK’yî Besê Erzîncane Medya Haber TV de bîye meymana programê ‘Ulkeden‘ û cewab da persanê înan.

Besê Erzîncan vist vîrî ke ê sey Têgêrayîşê Azadîye yê Kurdan demêko tarîxî ra ravêrenê û  va: ‘’Dimayê weçînitişê Stenbolî dewamkerdişê tecrîdî, hêrişê îşxalî yê vera Xakurkê û tehdîtê vera Rojawanî nîyetê îqtîdarê AKP-MHP’yî ramojneno. Rayeyo hîrêryino ke Rayberîya ma vano, o tena seba Tirkîya nê semedê şaranê Rojakewtena Mîyanênene zî yo.’’

Erzîncane bale ante polîtîkaya dişmenîye yê AKP-MHP’yî yê vera Kurdan ser û va: ’’Çi heyf o ke dewleta Tirkî hêrişê xo yê vera Kurdan de paştdayîşo tewr girdî partîyêka  Kurdan, PDK’yî ra gêno. PDK vano qey eke ey înan rê hetkarî nêkerê nêeşkenê payra bimanê. La eke ê goreyê xo têbigêrê belkî hêzê xo hîna xurt kenê.’’

Erzîncane hêrişê vera Şengalî sey vera îrdayê cinîya azade hesibna û va: ’’Bi hêrişê qirkerdişî yê vera Êzidîyan ame waştene ke heme cinîyan  û şarê Kurdî rê mesajêk bêro dayene. Xora hêrişê ke dewam kenê nê zî naye ramojnenê.''

Erzîncane vat: ‘’ Heta ke partîya Kurdan yew mebê, pîya têmêgêrê nêeşkenê ser bikewê. Heta ke PDK tekîlîya xo bi PKK’yî aver nêbero û AKP’yî ra dûrî nêkewo nêeşkeno cayê xo garantî bikero. Roje ma de no wina yo; çew bi tîfaqê  hêzanê sîyasî yê dormeyê xo aver şino. Bi şerkerdiş û dişmenîye nê. PDK ganî nînan newe ra bifikîrîyo.’’

Erzîncane  kampanyaya ‘’Seba vurayîşî û azadîye ti zî hurze payan ser” ya ke rayberîya cinîyan de ameye destpêkerdene zî ercna û nê vatî: ’’Vera şeran, mergan,  rijnayîş û qetlîman semedê cuyeyêka alternatîfe ganî mucadele hîna xurt bo.  Coka kampanya û hemleyê  ke bi sloganê ‘Kurdistan de seba vurayîşî û azadîye ti zî hurze payan ser’ yenê viraştene zaf muhîmê. Kerdoxê bingeyênî yê sîyasetê demokratîkî cinîyê. Sîyaseto demokratîko ke Rayberîya ma vano tewr zaf bi hemleyanê cinîyan yeno pratîkkerdene. Na hemle tena hemleya çalakî, vervejîyayîş, redkerdiş û rexnekerdişî nêya. Heman wextî de hemleya awankerdişî ya. Têgêrayîşê şorişgêran ê dinya vînkerdişo tewr gird tîya kerd. Rexne kerd, red kerd la herinda ci de alternatîfêk pêşkêş nêkerd. Mucadeleyê PKK’yî zaf muhîm zemînêk û kîtle vetî werte la problemê ma yê resayîşê kîtleyanê hîrayan esto. Ez bawer kena ke hemle na babete de aver şire û bi meclîs û komînan birese heme hetan. Cinîyî ganî tena xîtabê tayî hetan nêkerê, goreyê şarî têbigêrê û heme hetan biancê mîyanê hemleye û mucadeleyî xurt bikerê.’’