Endama Koodînasyonê KJKyî Besê Erzîncana ke ANFyî rê qisey kerd ard ziwan ke polîtîkaya tecawuzî ya vera cinîyan ê kurdan hetê dewlete ra yena kerdene.

Erzîncane vat: ''Demo peyên de sere de cinîyê kurdan Tirkîya de vera heme cinîyan qirkerdiş û tecawuzî zêdîyayî ke yeno waştene ke Pêkerdişê Îstanbulî bêro wedartene. Çareserkerdişê meselaya kurdî û caardene Pêkerdişê Îstanbulî yewbînan rê girêdeyeyê. Êyê ke wayîrê Pêkerdişê Îstanbulî vejîyenê gerek wayîrê heqê şarê kurdî zî vejîyê. Êyê ke semedê heqê kurdan têkoşîn kenê gerek wayîrê Pêkerdişê Îstanbulî zî vejîyê û semedê heqanê bînan ê demokratîkan zî têkoşîn bikerê. Eke wina hêzê demokrasî û azadîye pîya têbigêrê eşkenê peynîya faşîzmî bîyarê.

Ma merhaleyêka krîtîk de yê Rojhelatê Mîyanênî de ya rengê azadîye ya zî rengo sîya yê faşîzmî beno hakîm. Têna Rojhelatê Mîyanênî de zî nê dinya de serkeşîyê faşîzmî dewleta tirke kena. Xora bi paştgêrîya xo ya çeteyanê DAÎŞî zî no ramojna ke cayo ke destê ci reseno ci çeteyan tede ca kena. Îtîfaqo faşîst ê AKP-MHPyî şexsê cinîyan ê kurdan de vera şaranê Rojhelatê Mîyanênî, îtîqatan şer akerdo. Kerdişê îqtîdarî dewamê zîhnîyetê Îttîhat û Terakkî yo. Tecawuzê çawişanê pîsporan ê vera cinî û domananê kurdan, qirikeridşê cinîyan, zîndaneştişê cinîyan û tam zî nê wextî de vatişê batelkerdişê Pêkerdişê Îstanbulî zîhnîyetê înan o  faşîst o  ke pîrikanê ci ra mîras girewto, ramojneno.

Seke yeno zanayene wexto ke tirkî Asaya Mîyanêne ra ameyî Rojhelatê Mîyanênî, Kurdîstanî  tîya vera şaran û îtîqatan hêrişê pîlî kerdî. Hêrişê tecawuzî, qirkerdişî kerdî û wina xo tîya ca kerd. Şarê sey rum, ermenî, kurd, suryanî û xeylêk şarê bînî ke bi des hezaran serran o cayîyê Mezopotamya yê bi hêrişê tirkan erdê nê şaran înan rê bi sey goristan. Tradîsyonê Osmanî de fetkerdiş vatiş û çalakî sey esas yeno girewtene. Na çarçewe de qirkerdişî binê rîyê fermî û dînî de yenê nimitene. Şertê fetkerdişî têna talan nîyo. Cayê ke yenê destfînayenê  şarê ci gerek bibo musluman dest û nîyeno cinîyan û domana ser. Cinîyan rê tecawuz yeno kerdene û sey esîr yenê girewtene.

Xora vera qirkerdiş û zîhnîyetê tecawuzî yê dewleta tirke şaran û cinîyan xoverdyîşê pîlî dayî. Tarîxê ma yo nizdî de Bêseyan, Zarîfeyan, Bêrîtanan, Zîlanan, Avesta Xaburan, Ekîne Vanan, Hêlîne Bolekan û ciwanê xovedayoxî yê Pirsûsî tewirê xo ramojna. Reyna no xoverdayîş Şorişê Rojawanî  û têkoşînê gerîlayan de zî ame dîyene. Xoverayîşê Rayberîye nimûneyo tewr pîl o. Na çarçewe de gerek vera aqilê faşîst ê camêrdî xoverdayîş esas bêro girewtene.

Tewr peynî de Şirnex û Êlih de çawişanê tirkan tecawuzê cinîyan ê kurdan kerd. No zî gerek sey pabesteyê tarîxî bêro destgirewtene. Polîtîkaya tecawuzî ya vera cinîyan ê kurdan bi destê dewlete yena kerdene. Nê çawişî bi taybatî ameyî wezîfekerdene ke polîtîkaya taybete yê şerî rayra berê. Wazenê îradeyê şarê kurdî bişiknê û teslîm bigerê. Gerek keyeyî hîşyar bê qewimîyayîşanê winayênan mîyan metepişê. Têkoşîno hempar, yewbînan rê wayrî vejîyayîş zaf muhîm o. Çirey vera nê qewimîyayîşan bêveng memanê ke wa nê qewimîyayîşî vila mebê.

Ma do vera nê zîhnîyetê talanker û tecawuzkerî têkoşînê cinîyan pîl bikerê.  Heftanîn de gerîlayî semedê azadîye têkoşînêko biheybet danê. Ma do  şexsê Rustem Cûdîyan, Esmeran, Nûrcanan û Memyanan ê ke Heftanîn de şehîd bîyî, tewirê xoverdayîşî yê heme şehîdanê Heftanînî esas bigerê aver şirê û miheqeq ser bikewê. Cinî û camêrdanê ke  semedê afernayîşê cuya azade sond wend, do na herre de cuyeyêka alternatîf ronê.''