Wextanê peyênan de Ewropa de şîdetê vera cinîyan zêdîya. Cinîyanê kurdan û rêxistinanê cinîyan ê Ewropa pê çalakîyan hêriş û şîdetê vera cinîyan protesto kerd.

Deen Haag

Meclîsê Cinîyan ê Ronahî şaristanê Den Haagî yê Hollanda de şîdetê vera cinîyan protesto kerd û Terteleyê Dêrsimî zî şermezar kerd. Çalakîye de bale ameye antene ser ke sebebê mergê endamê Grup Yorumî Îbrahîm Gokçek zî dewlet a.

Wuppertal

Meclîsê Cinîyan ê Şehîde Vîyane şaristanê Wupertalî yê Almanya de vera şîdetê serê cinîyan çalakîyêke kerde. Çalakîye de fotografê cinîyanê ke ameyî qetilkerdene û alayê TJK-E ameyî akerdene. Çalakîye de hetê TJK-E ra vilawekî zî ameyî vilakerdene.

London

Şaristanê Londonî yê Îngilîstanî de rayberîya Yeni Kadin, Merkezê Kulturê Elewîyan, Yewîya Cinîyan ê Sosyalîstan, Komîsyonê Cinîyan ê Alxasî, Komîsyonê Cinîyan ê Komeleya Kurekçîyan, Cemxane, Têgêrayîşê Cinîyan ê Demokratîkan ê Ewropa de hêrişê vera cinîyan ameyî protestokerdene. Çalakîye de fotografê cinîyan ameyî berzkerdene û sloganê 'Cinîye, Cuye, Azadîye' ameyî vatene. Çalakîye de veng zî ame dayene ke wextê pandemîya vîrusê Korona de şîdetê vera cinîyan zêdîya û ganî vera naye bêro têgêrayene.