Fermandaranê Hêzanê Pawitişê Cinîyan ê Rojhelatê Kurdîstanî (HPJ) Berfîne Denîz derheqê kongreya KJARî de qisey kerd ke 2-4ê nîsane de amebî kerdene. Kongre de xeylêk rojdemê girîngî ameyî nîqaşkerdene û netîceyê serkewteyî ameyî destvistene.

Qiseykerdişê Berfîne Denîze ra beşêk wina yo: 

''Ma kongreya xo de rojdemê girîngî ercnayî. Rojdemê ma yo sereke tecrîdê Rayber Apoyî bi. Ma nîqaş kerd ke ma do senî têkoşîn bikerê ke tecrîd weradê. Netîceyê kongreya ma seba cinîyanê dinya do bibê rayber. Ma nîqaş kerd ke ganî KJAR vera hîşmendîya serdestîya camêrdan senî têkoşîn bikero. Rojhelatê Mîyanênî de bi taybetî Rojhelatê Kurdîstanî û Îran de vera cinîyan şîdet û teda asta berze de yê. Seba ke KJAR rayberîya nînan nêkero verê ci yeno girewtene. Seba ke ma rayberîya cinîyan ê kurd, ereb, belûc, îranijan  bikerê kongre de plansazîye ameye kerdene. Ma eşkenê vajê ke ma çimeyê cinîyanê Rojhelatê Mîyanênî yê û keda cinîyanê Rojhelatê Kurdîstanî yê. Cinîyî eşkenê kongreya ma de bivînê ke ma pê îradeyê xo yê xoserî heqê xo wazenê û sîstemê xo danê awankerdene. Cinîyî xo ra bawer ê. Ganî cinîyî xo sîstemî ra azad bikerê û abigêrê raştîya xo ser. Ma pê bawer ê ke sîstemê xo reyde ke ma kongre de nîqaş kerd, ma do nê îradeyê cinîyan geş bikerê.

Yewîya kurdan û cinîyan zî rojdemêkê ma yo girîng bi. Ma venga pêro cinîyan danê ke ma rayberîya sîstemê yewîya cinîyan bikerê ke ma bieşkê yewîya cinîyan ê kurdan awan bikerê. Yewîya kurdan û yê cinîyan yewbînan ra cîya nîyê. Rayber Apoyî cinîyan rê rayîrê azadîye kerd a. Seba ke ma xo û Rayber Apo azad bikerê ganî ma têkoşînêkê bêhempayî bikerê. Ma do her ca de seba Rayber Apoyî bikewê têkoşîn.

Şerê Kurdîstan û Rojhelatê Mîyanênî seke şero hîreyîn ê dinya yo. No şer tewr zaf tesîrê cinîyan keno. Sîstemê Konfederalîzmê Demokratîkî seba awankerdişê yewîya cinîyan û qedînayîşê nê şerî ganî sey esas bêro girewtene. Ganî seba ci şoriş bêro geşkerdene û rayberîya cinîyan bêra xurtkerdene. 

Ma eşkenê vajê ke kongreya ma seba her kesî bîye moral û coşêk. Ma hînî pê bawer ê ke na kongre têna seba ma nê, seba pêro cinîyan ê kurdan û cinîyanê Rojhelatê Mîyanênî bîye moral û coş. Ma esasê fikr û felsefeya hêvîya şaran û cinîyan ser o rayîrê xo ra şinê.''