Endama Koordînasyonê PAJKî Besta Firate roja Îneyî tewrê bernameyê ‘Rojeva Jin’î yê Stêrk TVyî bîye û polîtîkayanê dewlete û mucadeleyê cinîyan ser o qisey kerd.

Besta Firate vat ganî cinîyî kuçe bi kuçe perwerde bigîrê û xo organîze bikerê, cinîyî ancax bi nê hawayî eşkenê şidetî ra bixelesîyê.

MUCADELEYÊK KE HER DEMÎ RÊ VILA BÎYO

Firate vat: “Tarîx de aya ke reya ewilêne amî kolonîzekerdene cinî bîye, aya ke reya ewilêne şidet dî ancî cinî bîye. Zihnîyeto serdest ê mêrdeyî nê şidetî ser o awan bi. Loma mucadeleyê hemverê nê şidetî ganî bi roja 25ê Teşrîna peyêne nêro sînorkerdene, her demî de bêro dayene.

Her roje cinîyan ser o hêrişî yenê viraştene, kiştişî yenê kerdene. Rîyê cinsîyetperwerîya ke hetê faşîzmî ra yena xurtkerdene cinîyan rê caye cuye nêameyo verdayene, hêrsê cinîyan ê hemverê nê yeno vînayene.”

KAMPANYA DO DEWAM BIKERO

Firate ard vîrî keso ke reya ewilêne îradeyê cinî veto meydan û cinîyî resnayê hişmendîya azadîye Rayberê Şarê Kurdî Abdullah Ocalan o û wina vat: “Tecrîd û şideto ke serê Ocalanî de yo tecrîd û şidetê serê cinîyan o. Ma do sey cinîyê kurdî kampanyaya ke seba şiktişêtecrîdî daya destpêkerdene bidê domnayene.”

Firate muhîmîya Konferansê Cinîyan ê Mîyaneteweyîyî ser o vinderte û vat “Nê konferansî berê umîdî akerdê, ruho ke her cayî ra cinîyan binê slogana ‘Jin, Jiyan, Azadî’ ya ke hetê Rayber Apoyî ra amîya averberdene ardî têhet mucadele bi xo bi.”    

KEYE BI KEYE ORGANÎZEBÎYAYÎŞ

Firate vat ganî organîzasyonê cinîyan kuçe bi kuçe, keye bi keye biresê heme cinîyan, perwerde bidê û înan organîze bikerê. Tewr peynî de zî Firate veng da mêrdeyanê ke raştê şidetê dewlete yenê û vat: “Ganî şima têkilîya sîstem-bendeyî rind tehlîl bikerê, xo bivurnê û cinîyan dir têkîşte de mucadele bidê.”