Operasyonanê qirkerdişê sîyasîyî de îdarekarê Komeleya Cinîyan a Rosa, aktîvîstê Têgêrayîşê Cinîyan ê Azadan (TJA) û Mayê Haştîye zî tede zaf sîyasetmedarî ameybî destbendkerdene. Vera rewşe nêrazîbîyayîşî dewam kenê.

Vervatoxa Têgêrayîşê Cinîyan ê Azadan (TJA) Ayşe Gokkan destbendkerdiş û tepiştşê cinîyan ê sîyasetmedaran û aktîvîstan şermezar kerdî û îfade kerd ke nê hêrişî têkoşînê cinîyan hedef gênê. Ayşe Gokkan vat: ''Tirkîya de rejîm vurîya, rejîmê yewkesî esto û hîşmendîya serdestîya camêrdan yena naskerdene. Pêro heqê merdiman yenê binpaykerdene, her kes eşkeno bi azadî xo rexistin bikero. Qanûnanê Dewletan ê Yewbîyayeyan de zî derheqê şîdetê vera cinîyan de pêro dewlete berpirsîyarîya xo anê ca. La dewleta tirke berpirsîyarîya xo nêana ca. Vanê 'Bikişê, ma peyê şima de yê.' Serekkomar, wezîr, parlamenter û serekê AKP-MHPyî pê vatişanê xo camêrdan seba şîdetî, qetilkerdişî teşwîq kenê.''

Gokkane ard ziwan ke nê hêrişî û destbendkerdişê peyênî qet yew qanûn de nênê pênasekerdene û vat: ''Kesan rê ke nezaretî de yê vanê 'Şima çira 8ê adare serûber kenê?, Çira têkilîya TJA rêxistinanê bînan reyde esta?' Seke yeno zanayene pê KHKyan pêro rêxistinê cinîyan ameybî girewtene. TJA û Rosa Amed de vera şîdetê serê cinîyan têkoşîn kenê. Dewlete bi nê hawayî vana wa çew vera şîdetî xebate nêkero. Eke kes bikero vanê 'şima xayîn ê, terorîst ê.' Seba ke ma kurd ê Kurdîstanî de zêdêr hêrişê ma kenê. Ê vatişê ma yê 'Hemserekîye xeta ma ya mor a' sey sûc ercnenê. No bêqanûnî yo. Dewlete Korona sey firsendêk dîye. Pêro merdimî eştî keye la Dayîke Havva mîyanê bi desan de dest bend kerde. Dewlete prosesê Korona de dişmenîya kurdan, cinîyan û domanan kena.

Seba ke dewlete rojdemê qeyûm bivurna hêrişê cinîyan kena. Ma gamêke apey do nêerzê. Nê zî naye zanenê. Pê nê hêrişan wazenê komel bitersnê. Ma bêvengîya mîyanneteweyî ya vera nê hêrişan şermezar kenê. Pê na bêvengîye paştî danê dewleta tirke. Ganî pêro terefê Tirkîya vera qanûnê zewajê domanan tewirê xo bimojnê.  Ma do vera hîşmendîya yewpereste û serdestîya camêrdan têkoşînê cinîyan xurt bikerê.''