Vervatoxa Platformê Rojnamegeran ê Cinîyan ê Mezopotamya (PRJM) û edîtora tirkî ya Jinnewsî Ayşe Guney derheqê ziwanê çapemenîye yê qetilkerdişê cinîyan de qisey kerd.

Ayşe Guney pare kerd ke cinîyî hînî bîyî hêzê vurnayîşan û vat: ''Têkoşînê cinîyan do eşkera bikero ke proses senî dewam bikero. Çalakî û aktîvîsteyê cinîyan bi ziwanêkê nêrîyî medya de ca gênê. Mîsal seke îqtîdarî qet Peymana Îstanbulî îmza nêkerde xeberî wina nusîyenê. Îqtîdar cara vera medya tedayêka girane kena. Medya xeberanê kişîyayîşê cinîyan de ziwanê nêrî yê îqtîdarî xebitnena. Mîsal vana 'Mêriko ke hesûdî kerdî cinîya xo kişte' ûsn. Bi nê hawayî sûcê camêrdan yenê peygoş kerdene. La wexto ke cinîyî çew bikişê seba nînan medya çekuyanê sey 'canî' xebitnena.  Coka ganî rojnamegerî ziwanê medya bi hawayêkê raştî bixebitnê. Seba ke xeberan de ziwanê serdestîya camêrdan bêro wedaritene  ganî têkoşînê cinîyan kişf bibo.

Dezgehê medya yê sey Jinnewsî wayîrê mesuldarîyêka pîler ê. Çunke ganî ma bibê vengê ê cinîyan ê bêvengan. Ganî ma nê manîpulasyonî werte ra wedarê. Çapemenîya azade na babete de tay aver şîye. ''

Ayşe Guney vist vîrî ke Jinha serra 2012î de ronîyaye û dima ke hetê KHKyan ra ame girewtene bi nameyê Şûjin û Jinnews rayîrê xo domîna.  Guneye da zanayene ke blog û sîteyê xeberan ê cinîyan zêdîyenê.

Guneye vat: ''Ma mîsyonêko wina girewt xo milî ke ma wazenê camêrdan bivurnê. Tîya seba ma warêkê têkoşînî yo. Yanî ma têna rojnamegerîye nêkenê.''