Endama Meclîsê Partîye yê DPyî û çalakîkera TJA Halîde Turkoglu derheqê tecrîdê vera Rayberê Şarê Kurdî Abdullah Ocalanî, raporê CPTyî û çareserîya meseleya Rojhelatê Mîyanênî de rolê Ocalanî de ANFyî reyde qisey kerd.

Halîde Turkoglu îfade kerd ke serra 1999î ra nata vera Ocalanî tecrîdêko giran esto û vat: ''No tecrîd Tirkîya de hînî bîyo rejîm. AKP seba ke payan ser o bimano tecrîd keno giraner. Krîzo ekonomîk, meseleya kurdan pêro tecrîdî ra semed qewimîyenê. Seba çareserîya nê meseleyan ganî tecrîd bêro şiknayene. ''

Halîde bale ante raporê CPTyî ser û vat: ''Her çiqas no rapor zaf erey mendo û kêmn bo zî reya verêne bi vengêkê berzî yeno vatene ke Îmrali de tecrîd bîyo sîstemê rejîmî. Reya verêne tecrîd hetê dezgehêkê fermîyî ra ame qebulkerdene. Rapor de selahîyetdarê dewlete nênê hîşyarkerdene. Na kêmasîyêk a. Ganî CPT Tirkîya hîşyar bikero ke bi hawayêkê keyfîyî têgêrena. 

Seba wedaritişê tecrîdî rolê pîlî kewenê milê dezgehanê heqanê merdiman, rêxistinanê komelê sivîlî û sîyasetî. Ganî asta mîyanneteweyîye de demokrat, sosyalîst û azadîwaştoxî welatanê xo rê teda bikerê.  Ganî ma wayîrê Abdullah Ocalanî vejîyê. Heta tecrîd nêro şiknayene Tirkîya û Rojhelatê Mîyanênî de qet yew mesele çareser nêbena. Coka ganî şarê Rojhelatê Mîyanênî û Tirkîya hetê enternasyonalîstan de ca bigêrê, vera tecrîdî tewirêkê zelal û cidîyî bimojnê.

Eke tecrîd bêro şiknayene Tirkîya û Rojhelatê Mîyanênî de şer qedîyeno û xeta hîrêyîne vejîyena werte. Eke tecrîd bêro şiknayene vengê Birêz Ocalanî reseno şaran û haştîye awan bena.''