Meclîsê Cinîyan ê Rojbîne yê Hamburgî bi eşkerayîye ke da pêhesanayene ke camêrdêk waşt ke cinîya xo ya verêne û qijanê xo bikişo. Eşkerayîye de ame vatene ke cinîye koma de ya û semedê girdkerdişê xoverdayîşî ame vengdayene.
Meclîsê Cinîyan ê Rojbîne yê Hamburgî derheqê hêrişê vera cinîyêke û qijanê ci de eşkerayîyêke daye û nê vatî:
''1ê gulana 2020î de Hamburg de cinîya kurde hetê mêrdeyê ci yo verên o ke 7 serrî yo yewbînan ra cîya ciwîyene ra raştê hêrişê giranî ameye. Goreyê polîs û çapamenîya almanî mêrdeyo verên K.E bi kard û madeyê vêşnayîşî şino keye. Keye de milê cinîye bi kard birneno û bigiranî birîndar keno.Benzîn keno lajê xo yê 10 serreyî ro û tafîneno. Dima ra vejîyeno balkon ser ra qîreno vano 'ez do pêrune tafînî'. Kênaya 12 serrî hetkarî wazena û birîndarî yenê berdene nêweşxane. Cînîye hema koma de ya.''
Eşkerayîye de bale ameye antenê cînayetanê cinîyan ê Almanya ser û ame vatene ke emser Dormund de Onalia Cendy û Hildesheim de Besma Akinci hetê mêrdeyanê xo ra ameyî qetilkerdene. Meclîsê Cînîyan ê Rojbîne şîdetê vera cinîyan o ke rojanê Korona de zêdîyayo şermezar kerd û cinîya birîndare û qijanê ci rê şîfa waşte. Cinîyan veng da heme cinîyan ke wa têkoşînî xurtêr bikerê ke vernîya şîdetî bêro girewtene.
