Komîteya Rayberdişê Têgêrayîşê Yewîya Şorişgêre ya Şaran yew beyanatêko nuştekî pare kerd û beyanatê xo de wina vat:

“Rejîmo faşîst vera şaranê Kurdistan û Tirkîya, şerê tewr bi zulm û zordarîye domeneno. Cinîyî, ciwanî, karker û kedkarî nê şerî de xo rê kerdî hedef. Edî pêro hetan cayê xo  kerdo kifş û kesê ke demokrasî, azadî û seyyewbînîye wazenê bîyê hedefê rejîmê faşîstî.

Îqtîdaro faşîst îmrali de, Rayberê Şarê Kurdî Abdullah Ocalanî ser o tecrîdê giranî domneno. Rejîmê Erdoganî, çar parçeyê Kurdîstanî de keno ke destkewteyanê Kurdan çîn bikero. Bitaybetî zî tecrîdê serê Rayber Ocalanî,hêrişo tewr pîl o.

Grevê vêşanîye yê Hemsereka KCD‘yî û parlamentere Leyla Guvene kewt roja xo ya 82’yîne. La ewro xeylî xoverdayoxî wayîrê talebanê Leyla Guvene vejînê. Kurdistan û hepisxaneyanê bînan ra xeylî xoverdayoxî vanê talebê Leyla Guvene talebê ma yê.

Rejîmo faşîst polîtîkaya şerî hîna kerda hîra.Vera kerker û pêroyê kesanê bindestan, şerêko qilêrin îlan kerdo. Kurdistanê Vakurî de operasyon û tedayîyî her wextî ra hîna zaf dewam kenê. Kesê ke wazenê paştdarîye bidê Leyla Guvene, rastê teda û îşkenceyî yenê. 

Rejîmê Erdoganî yo faşîst şoreşê Rojawanî tehdît keno. Şoreşî xendeqnayene, eke nêbo zî çinkerdişê destkewteyanê ci,  kerdo bingehê polîtîkaya xo. Rejîmê Erdoganî no derheq de, seba ke netîce bigîro tawîzan dano hêzanê emperyalîstan.

XOVERDAYÎŞÊ BAŞÛRÊ KURDISTANÎ REFLEKSÊKO MUHÎM O

Operasyon û hêrişê hewayîyî yê Başûrê Kurdistanî, Wareyê Pawitişî yê Medya hedef gênê. Bi no qeyde, tena hêzê leşkerî nê, şaro sivîl zî yeno qetlkerdene. Her roje  cinî û domanê şarê Başûrê Kurdistanî benê hedefê terorê faşîstan. Netîce de şarê Başûrê Kurdistanî vera hêrişê hewayîyî yê artêşa Tirkî, xoverdayîşêko muhîm da bi destpêkerdene.

Rejîmo faşîst, kam ke ey ra nîyo, ey xo rê dişmen vîneno. Ganî kedkar, karker û pêroyê şarê bindestî, vera faşîzmî vindertişî xo rê sey yew wezîfe bivînê û xoverdayîşî bikerê berz. Ma sey Têgêrayîşê Yewîya Şorişgêre yê Şarî, paştdarîye danîme xoverdayîşê Leyla Guvene û vanîme no xoverdayîş ê ma yo.Welatê ma û Rojakewtena mîyanêne de bê mucadele, demokrasî, azadî û seyyewbînîye nêna sere. Wezîfeyê ma yo tarîxî o yo ke ganî ma xoverdayîş de israr bikîme û mucadeleyê xo hîna bikîme berz.

Ewro xoverdayoxê neweyî wayîrê talebanê Leyla Guvene vejînê û hûmara xoverdayoxan her ke şona bena zêde. Bi nê esasan ma sey Têgêrayîşê Yewîya Şorişgêre yê Şaran, wazenîme ke serra 2019’î de mucadeleyê xo hîna avêr berê û bikerê serra serkewtişî.Xoverdayişê Leyla Guvene bîyo sey vewrêsî. Nika ganî pêro hêz û kesê ke azadî, demokrasî û seyyewbînîye wazenê nê xoverdayîşî rê wayîrîye bikerê û sey mucadeleyê xo bivînê.

Ma bi hişmendîya berpirsîyarîya tarîxîye xoverdayîşê Leyla Guvene û pêroyê xoverdayoxan selam kenîme û vanîme wa talebê înan derhal bêrê qebulkerdene.Her çiqas ke bi teda û şîdetî tê bigêro zî, ma baş zanîme ke rejîm edî wextê xo yê kewtişî de yo.''