Vervatoxa Meclîsê Cinîyan ê HDPyî Ayşe Acar Başaran merkezê pêroyî yê HDPyî de kombîyayîşê çapamenîye kerd û startê 25ê Teşrîna Peyêne Roja Têkoşînê Ver Şîdetê Serê Cinîyan da.

Başarane hêverî bi wesîleya Roja Kobanê ya Dinya pêro cinîyê şehîdî yad kerdî û îfade kerd ke Şorişê Kobanê heman wextî de şorişê cinîyan o. Başarane eşkera kerd ke îqtîdarê AKP-MHPyî paradîgamaya azadîya cinîyan a Kobanê ra terseno û coka vera Kobanê û kesanê ke wayîrê Kobanê vejîyenê hedef keno. Başarane bale ante ser ke hîşmendîya Kobanê ya ke Kobanê de hetê cinîyan ra ameye binkerdene ewro Viyana û Fransa de reyna xo mojnena ra.

Başarane darbeya sîyasî ya vera HDPyî serrgêra ci ya 4. de viste vîrî û da zanayene ke na darbe heman wextî de vera têkoşînê cinîyan, sîstemê hemserekîye û temsîlîya têdûşte ya HDPyî ameye kerdene. Başarane pare kerd ke ê do destkewteyanê xo ra fek vera nêdê.

Başarane polîkayê cinîyan ê îqtîdarî bi ziwanê tûjî rexne kerdî û vat herinda ke îqtîdar îstîsmarê domanan meşrû bikero ganî domanan bipawo û hewcedarîyanê cinî û domanan peyda bikero.

Başarane  qiseykerdişê xo wina dewam kerd: ''Cinîyî budçeya xo wazenê, seba naye ma xebata xo kerde  û raporê xo zî do pêşkêş bikerê.

Roja Têkoşînê Vera Şîdetê Serê Cinîyan bena nêzdî la cînayetê cinîyan dewam kenê. Na menge 21 cinîyî kişîyayî û 8 cinîyî zî bi hawayêkê şikdarî merdî. La îqtîdar nê mergan qebul nêkeno, Peymana Îstanbulî nêano ca. Îqtîdar bi hawayêkê topyekûnî hêrişê cinîyan keno. La ma do têkoşînê xo ra fek vera nêdê.

Ma do 7ê teşrîna peyêne de startê Roja Têkoşînê Vera Şîdetê Serê Cinîyan bidê. Ma do hesabê cinîyanê ke ameyî qetilkerdene bipersê, vera qeyûman vengê xo berz bikerê, her dewe, kuçe û taxe de cinîyan reyde bêrê têhet, patdayîş û rêxistinîya xo pîtêr bikerê. Ma do têkoşînê vera şîdet dewam bikerê. Ma venga pêro cinîyan danê ke bêrê ma pîya vera polîtîkayanê cinîyan ê îqtîdarî têkoşîn bikerê.  Çunke yewî, paştdayîş û rêxistinîya ma do cuya ma bipawê.''