Hemşaredara Verêne ya Nisêbînî Sara Kaya rê ke çeleyê 2017î ra nata tepişte ya, cezaya zîndanî ya 16 serran ameye dayene. HDPyî vera ceza nêrazîbîyayîş ramot û vat wazenê bi cezayan ma bitersnê la ê do xo bin bikewê.
Sara Kaya 13ê çeleyê 2017î de operasyonêkê sereştişê keyeyî de ameye tepiştene û Kayaya ke wezîfeyê xo ra gêrîyaye, herinda ci de qeyûm ame tayînkerdene.
Roniştişê bira dewaya Kaya Mehkemeya Cezaya Girane ya Mêrdînî de ame kerdene. Kaya bi îdîaya 'xeripnayîşê yewîya dewlete, endamîya rêxistine' yena hukmkerdene. Kaya pê rayîrê SEGBÎSî Zîndanê Tarsusî ra tewra mehkeme bîye.
Mehkeme derheqê Kaya de waştişê muebede kerd. Kaya û avûkatanê ci îdîayî red kerdî.
Heyetê mehkeme bi îdîaya 'xeripnayîşê yewîya dewlete, endamîya rêxistine' cezaya 13 serran û 6 mengan e daye Kaya. Heyetê mehkeme reyna bi îdîaya ke 'wezîfeyê xo bi hawayêkê xerabî xebitna' 6 menge û bi îdîaya ke 'şar pê nefret û kîn kerdo de' 2 serre ceza daye Kaya. Mehkeme bi temamî cezaya zîndanî ya 16 serran daye Kaya.
Hetê bînî ra Komîsyonê Heqanê Merdiman ê HDPyî vera bira mehkeme nêrazîbîyayîşê xo mojna û îfade kerd ke bire nêna 'qebulkerdene.'
Komîsyonî vat: ''Dosya hetê Mudirê TEMî Unal Uyarî ra ameye amadekerdene ke îşkence û talanî ra yeno hukmkerdene. Îqtîdar fikirîyeno ke pê ceza û tepiştişan çimê HDPyîjan do bitersno. La kamê ke wina fikirîyenê do bin bikewê.''
