Qezaya Akdenizî ya Mersinî de polîsan eşt keyeyanê Hemşaredaranê Akdenizî Hoşyar Sariyildiz û Nuriye Aslan û endamê meclîsî ser. Sereştiş de hemşaredarî û endamê meclîsî yê şaredarîye Ozgur Gaglar, Yakup Daniş, Himket Bakirhan û Neslîhan Oruç ameyî destbendkerdene, banê şaredarîye gerîya binê ablûqa.

Rêxistina bajarî  da zanayene ke saete 10.00 de do eşkerayîye bidê û waşt  vera waştişê destsernayîşê şaredarîye wa şar tewrê eşkerayîye bibo.

DEM Partî eşkerayîya xo de nê vatî: ''Îqtîdarê AKPyî vera îradeyê şarî pratîkanê xo yê darbekarî canêverdeno. Saetanê serê sibayî de Hemşaredarê ma yê Akdenizî Hoşyar Sariyildiz û Nurîye Aslan û çar endamê şaredarîye ameyî destbendkerdene. Şaredarîye gerîyaye binê ablûqa û dekewtiş û vejîyayîşî ameyî astengkerdene. No îqtîdaro dişmenê kurdan ke îradeyê şarî rê tehemul nêkeno, se keno wa bikero do dahîna gird vîn bikero. Ma do her ca de vera zîhnîyetê qeyûmî vinderê û îradeyê şarî bipawê.''