Hepsîyê cinîyî ke Zîndanê Tîpa Myî yê Bayburtî de manenî, bi mabênkarîya keyeyan dîyar kerdî ke zextî xeylê zêde bîyî û wa Komeleya Heqê Merdiman ra heyetêk bêro zîndan. Keyeyanê hepsîyan zî seba hesasîyetî veng da.
Hepsîyê cinîyî yê ke Zîndanê Tîpa Myî yê Bayburtî de manenî, derheqê neheqî û zextan de qisey kerdî û seba hesasîyetî veng dayî. Hepsîyan dîyar kerdo ke her ke şono zextî zêde benî û ê seba ke zextan protesto bikerî 3 rojî kewtî grevê vêşanîye. Hepsîyan dayo zanayene ke înan xo nê prosesî de nêresnayo avûkatan.
ZEXT, ASTENGÎ, TEHDÎT Û HÊRIŞ
Hepsîyan vato ‘tîya de merheba dayîşê yewbînan zî yeno asteng kerdene’ û wina dewam kerdo: “Destûr nêdîyeno lazimîyanê merdimîyan û hertim cezaya hucre û sewbîna yenî dayene. Werd bi hawayo sînordar yeno dayene. Ma ser o ferz kenî ke ma bi linganê warwayan bivejyî pêvînayîşan. Reyna ma ra vanî ‘şima nêşênî koguşan de kurdî qisey bikerî’ û ma tehdît kenî.”
Hepsîyan dayo zanayene ke hertim nizdîyê 30 rojan cezayê hucreyî yenî dayene û wexto ke ê vejîyenî cayê hilmgirewtişî, raştê hêrişê gardîyanan yenî.
Seke yeno zanayene no zîndan de xeylê hepsîyê dayîke ke bi domananê xo manenî estî û bi desan reyan vengdayîş amebî kerdene. Keyeyan zî va ke ‘heme zaf zeyîf bîyî’ û waşt ke wa hesasîyet bêro nîşan dayene.
