Mêrdeyê verênî yê Meryeme Şahîn Kalender Erdogan şaristanê Hamburgî yê Almanya de xîret kerd ke Meryeme Şahîn û domananê ci qetil bikero. Hêriş xeylêk şaristananê Almanya de pê çalakîyan ame protestokerdene.

Hamburg

Hamburg de  verê keyeyê Meryeme Şahînî de bi tewrbîyayîşê 200 kesan rayberîya Înîsîyatîfê Cinîyan ê Hamburgî yê Vera Şîdetî çalakîyêke ameye kerdene. Nameyê Înîsîyatîfî ser o Leyla Kaya qisey kerd û vat: ''Ma vera şîdetî hêrsên ê. Bi serran o ke seba ke wayîrê îrade, ameyox û bedenê ma bivejîyê kenê ke ma çin bikerê.''

Wekîla Partîya Çepe ya Hamburgî Cansu Ozdemîr zî çalakîye de qisey kerd û vat: ''Ma vera pêro şîdetî de yê û ganî femicide (qirkerdişê cinîyan) çarçewa qanûnan de bêra ercaneyene.''

Çalakîye de pankartê bi nuştişê ''Hîşmendîya camêrdan kişena'', ''Destê xo îradeyê ma ra biancê'' û ''Kişîyayîşê cinîyan rê bes o''

Duisburg

Diusburg de zî Endamanê Meclîsê Cinîyan ê Şehîde Yuksele, SKB, Yeni Kadin û Die Linke zî tede zaf dezgehanê cinîyan saete 17:00 de Averdunkplatz de dest pê çalakîye kerd. Çalakîye de Meclîsê Cinîyan ra Nacîye Rojîn qisey kerd û vat: ''Her cayê dinya de bi mîlyonan cinîyî rîyê şîdetî ra ganê xo danê.''

Stuttgart

Stuttgart de Schlossplatz de endamanê Yeni Kadin, TJK-E, Zusammen Kampfen, Komeleya Vera Terteleyê Dêrsimî yê 1938î, SKB, Die Linke, Stuttgarter Frauenbundnis, ATÎK, ADHK çalakîye kerde. Çalakîye de şexsê Meryeme Şahîn de pêro qirkerdişê cinîyan ameyî şermezarkerdene.

Komeleya Vera Terteleyê Dêrsimî yê 1938î zî seba Terteleyê 4ê Gulane eşkerayîyêka bi kirdkî kerde û ogîtî vatî. Çalakîye de sloganê ''Cinîye, Cuye, Azadîye'' ame vatene.

Koln

Koln de endamanê Yewîya Cinîyan ê Sosyalîstan (SKB), Têgêrayîşê Cinîyan ê Ciwanan ê ZORA û Meclîsê Cinîyan ê Vîyane saete 17:-19:00 de Neumarkt de çalakîyêke kerde. Çalakîye de dowîzê bi nuşteyê ''Vera şîdetî vindere'', ''Şîdetê vera cinîyan cînayet o'' ameyî kiriştene.

Frankfurt

Frankfurt de  Hauptwache de rayberîya Têgêrayîşê Cinîyan ê Ciwanan ê ZORA, Yewîya Cinîyan ê Sosyalîstan (SKB) de çalakîye ameye kerdene û hêrişê vera Meryeme Şahîn ame şermezarkerdene. Qiseykerdişan ra dima seba çalakîya 6ê gulane vengdayîş ame kerdene.