Heyetê Cinîyan ê Îdareyê Xoserîya Demokratîke ya Herêma Cizîrî bale ante qirkerdişan ser ke Dewleta Tirkan Vakur û Rojhelatê Sûrîye de kena û veng da rêxistinanê heqanê merdiman ke verba îşxalkarîya Dewleta Tirkan wurzê payan ser.
Heyetê Cinîyan ê Îdareyê Xoserîya Demokratîke ya Herêma Cizîrî derheqê qirkerdişanê Dewleta Tirkan de beyanat weşana û veng da Rêxistina Heqanê Merdiman ê Cihanî.
Beyanatê Heyetê Cinîyan wina yo:
"Ma sey heyetêkê cinîyan ê Îdareyê Xoserîya Demokratîke, seba asayîşî, ewnîyayîş û pawitişê domanan xebitîyenê. Ê domanê ke dadî û babîyê xo rîyê hêrişanê herêmanê Rojawanî ra vîndî kerdî, hûmara înan dima ke Dewleta Tirkan Efrîn îşxal kerd, resaye 61 domanî. Labelê bi destpêkerdişê îşxalkarîya Tirkîya herêmanê rojhelatê Firatî de bîye zêde û resaye 70 domanî.
No têna îspat keno ke Tirkîya seba herême xêrêk nêwazena. Artêş û komanê ci Efrîn de sey kiştiş, remnayîş, koçkerdiş, talan, vurnayîşê demografîyî bi hezaran binpaykerdişê heqanê merdiman, sucî kerdî. Sucê ke Dewleta Tirkîya kerdî, sucanê DAÎŞ'î rê cîya nîyê.
Tirkîya û komanê ci dest pêkerd ke nê kerdişanê xo Girê Spî û Serêkanîyê de zî bikê. Her di şaristanan de zî kiştişê sivîlan, sîyasetmedaran, çalakîkeran û rojnamegeran zî tede zafê sucê şerî û binpaykerdişê heqanê merdiman kerdî. Hûmara sîvîlanê ke hetê Dewleta Tirkîya û komanê aye ra ameyî kiştene, 251 ra zêdêr a ke mabênê înan de doman zî estbî. Hûmara birîndaran zî bîye 1100 .
Seba ke ma pawitiş û miqatbîyayîşê domanan ra eleqedar ê, ma wazîfeyê xo yo exlaqî kerd. Naye ra ma veng danê rêxistinanê heqanê merdiman û merdimîye û pêroyê wazîfedaran ke zor bidê Tirkîya bikê ke Rojhelatê Firatî de îşxalkarîya xo biqedîna ke domanê ma komelêko azad, exlaqî, demokratîk, têdûşt û haştîyane de bieşkê bi hêwayêkê aramî û biasayîşî biciwîyê."
